Delina Ibrahimaj, ministe e Financave dhe Ekonomisë, njoftoi pas mbledhjes së sotme të qeverisë shfuqizimin e “Bordit të Transparencës”.
Sipas saj, vendimi erdhi pas stabilizimit të çmimeve në bursë.
“Gjatë vitit të kaluar, me fillimin e krizës së çmimeve, qeveria shqiptare, me propozim të ministrit të Financave dhe Ekonomisë dhe ministrit të Infrastrukturës e Energjisë ngriti një bord për kontrollin dhe monitorimin e transparencës së çmimeve në tregun e hidrokarbureve. Që prej asaj kohe, çmimet kanë pasur luhatje të ndryshme. Gjatë vitit të kaluar çmimet e naftës benzinës dhe gazit kanë pasur luhatje shumë të mëdha dhe kanë qenë ndjeshëm mbi normat e tyre historike. Kjo ishte arsyeja pse ne vendosëm nëpërmjet një akti normativ disa marzhe fitimi të cilat nuk mund të ndryshonin, me qëllim limitimin sa më shumë të ishte e mundur të efektit të spekulimeve me çmimet e hidrokarbureve, me qëllim që qytetarët të paguanin atë që realisht ishte për tu paguar dhe të limitonim abuzimet që mund të kishin kompanitë e tregtimit”, tha ministrja.
“Dhe në fakt gjatë gjithë vitit të kaluar ne kemi bërë mbledhje sa herë që ka pasur ndryshime të qenësishme çmimeve të bursës së hidrokarbureve dhe bazuar në çmimet e bursës, sipas një metodologjie të përcaktuar, përcaktoheshin dhe çmimet e tregtimit për konsumatorin. Gjatë tremujorit të parë ne kemi ndjekur me vëmendje të veçantë gjithë zhvillimet në tregun e bursës së hidrokarbureve dhe mund të themi se tregjet janë stabilizuar në çmimet që ishin përpara krizës, pra fund tremujori i tretë dhe i katërt i vitit. Bazuar dhe në vendimin e Gjykatës Kushtetuese e cila la në fuqi bordin e hidrokarbureve, bazuar dhe në stabilizimin e çmimeve, ne sot morëm vendimin për shfuqizimin e bordit të hidrokarbureve dhe situatës së veçantë në këtë treg”, shtoi.
Bordi në fjalë u ngrit me vendim të Këshillit të Ministrave pas luftës së Ukrainë në 12 mars 2022, me përbërje aktorë të tregut të karburanteve dhe anëtarë të qeverisë. Sipas qeverisë, synimi ishte shmangja e abuzimeve me çmimet që asokohe shënuan rritje të konsiderueshme.
Megjithatë, Bordi ka pasur kritika të shumta nga ekspertë që kanë konstatuar se uljet e çmimit në bursa, në shumë raste nuk janë përkthyer në ulje të tarifave nga bordi.
Opozita ndërkohë e ka akuzuar entin si një tjetër mekanizëm i përdorur nga qeveria e drejtuar nga kryeministri Edi Rama për vjedhjen e qytetarëve.
Një padi u depozitua në Gjykatën Kushtetuese më herët nga deputetë të PD, që kërkuan shkrirjen e bordit, të cilin e cilësuan organ antikushtetues. Gjykata megjithatë nuk e aprovoi kërkesën.
