Tre kryebashkiakë socialistë janë kallëzuar në SPAK nga opozita.
Deputeti i Partisë Demokratike Flamur Noka është paraqitu, mëngjesin e kësaj të Premte në ambjentet e Prokurorisë së Posaçme., ku ka qëndruar rreth 1 orë. Pas daljes nga SPAK, Noka në një deklaratë për mediat, ka treguar se ka dhënë dëshmi në lidhje me kallëzimet që Rithemelimi ka bërë për vendoret e 14 majit.
Noka tha se ka kallëzuar kryetarin e Bashkisë së Vaut të Dejës, Krujës dhe Vorës për përdorimin e parave publike për të blerë vota. Ndërsa shtoi se do të shkojë shpesh në Prokurorinë e Posaçme për të denoncuar.
“Isha për të dëshmuar për përdorimin e parave publike për blerje votash. Konkretisht bashkia Vau i Dejës u denoncua nje mega aferë në lidhje me një shifër të frikshme, njëherë 400 milionë dhe një herë 186 milionë për landfill, që ishte likujduar njëherë dhe është ripaguar prapë në kuadër të fushatës elektorale. Denoncuam kryetarët e bashkive Krujë dhe Vorë që kanë përdorur fondet e tërmetit, që është bërë legjendë tani. Si dhe kanë abuzuar me ndihmën ekonomike, duke bërë pagesa edhe për persona në kundërshtim me Kodin Zgjedhor. Ne do të denoncojmë përditë blerjen dhe manipulimin e votave. Janë shumë kallëzime, do më shikoni shpesh në këto dyer për të denoncuar. Detyra jonë është të denoncojmë farsën elektorale. Janë shumë kallëzime, do më shihni shpesh në këto dyer për të bërë denoncimet. Janë çështje që janë regjistruar, uroj të shkohet deri në fund dhe të mos ketë ndikim politik, SPAK do të vazhdojmë ta akuzojmë. Organet e drejtësisë kanë një mundësi për të provuar veten që të dalin jashtë xhepit të qeverisë”, tha Noka.
Deputeti demokrat u paraqit në Prokurorisë së Posaçme edhe me datën 23 maj lidhur me kallëzimet e opozitës për krime elektorale. Për mediat, ai zbuloi se ishte thirrur për dy çështje, atë të kryebashkiakes së Roskovecit Majlinda Bufi dhe për aplikacionin Aktivisti.
“Siç jeni në dijeni në këtë fushatë zgjedhore rilindja ka bërë një batërdi dhe në këtë aspekt ne kemi monitoruar dhe kemi paraqitur në SPAK një mori padish për këtë batërdi. Sot isha për të diskutuar në lidhje me dy çështje. Në lidhje me znj. Majlinda Bufi si kërcënuese, shantazhuese e qytetarëve për t’iu devijuar me dhunë votën dhe për të famshmen çështjes të Aktivistit që po ashtu shantazhonte, kërcënonte dhe survejonte administratën. Këto të dyja janë krime të rënda zgjedhore dhe ne do t’i shkojmë deri në fund. Të gjitha provat që disponojmë janë dorëzuar dhe çdo dokument që do të disponojmë do ta paraqesim. Hetim penal ka për çështjen e Aktivistit dhe znj. Bufi. Vota me dhunë dhe me presion duhet të marrë fund, vota duhet të jetë e lirë”, deklaroi Noka.
