Rovena Voda kërkon pafajësinë lidhur me çështjen e “arkës së pëshkut”, për të cilën është shpallur fajtore në GJKKO dhe më pas nga Apeli për veprën penale të ushtrimit të ndikimi të paligjshëm ndaj personave që ushtrojnë funksione publike.
Fillimisht GJKKO e dënoi ish-zëvendësministren e Brendshme me 10 muaj burgim dhe heqjen e së drejtës për të ushtruar funksione publike për një periudhë prej 5 vjet. Vendim ky që u la në fuqi nga Apeli në fillim të këtij viti. Pavarësisht dënimit me burg, Voda nuk shkoi në qeli pasi gjykata llogariti se koha e dënimit është ezauruar me qëndrimet në masën e sigurisë “Arrest në shtëpi”.
Ish-zëvendësministrja ka bërë ankim ndaj vendimeve të mëparshme në Gjykatën e Lartë. Gjatë deklaratave të saja publike, ajo gjithnjë është shprehur se është e pafajshme.
Megjithatë, sipas SPAK, Voda ka pranuar vlera monetare për të ndikuar në punësimin e Florinda Beut në ministri. Referuar hetimit të Prokurorisë së Posaçme, mes Vodës, Beut dhe Majlinda Hasanit janë realizuar tre takime në shkurt-mars 2020 në Ministrinë e Brendshme dhe në Durrës. Ato janë përgjuar teksa flasin për dhënien e një zarfi me 1 mijë euro Vodës dhe janë filmuar në një bar në Durrës, teksa i japin zv.ministres një aparat celular. Lidhur me episodin e tretë, SPAK thotë se Voda ka shkuar në port me automjetin e Ministrisë së Brendshme që mbante si zyrtare e lartë dhe shoferin e saj për të marrë një arkë me peshk.
