Gjykata e Elbasanit ka liruar dy rusët Svetlana Timofeeva dhe Mikhail Zorin si dhe ukrainasin Fedir Alpatov. Gjykata ka pranuar kërkesën e prokurorisë që ka ardhur për shkak të përfundimit të afateve të paraburgimit.
Timofeva dhe Alpatov do të qëndrojnë nën masën detyrim paraqitje, ndërsa Zorin arrest shtëpiak.
Svetlana Timofeeva 34 vjeç u arrestua më 20 gushtin e kaluar së bashku me Mikahil Zorin, 23 vjeç dhe ukrainasin Fedir Alpatov, 24 vjeç, pas një incidenti të ndodhur brenda rrethimit të ish-uzinës së armëve në Gramsh.
Zorin kundërshtoi dy ushtarakët që tentuan ta ndalonin dhe përdori spray me piper kundër tyre.
Tre të arrestuarit njihen si blogerë dhe janë pjesë e një subkulture të quajtur “Urban Explorer” apo “Urbex”; të apasionuar për të vizituar dhe fotografuar godina të braktisura, përfshi objekte ushtarake të “Luftës së Ftohtë”.
Megjithatë, prokuroria shqiptare i akuzon ata për spiunazh dhe pretendon se treshja kishte ardhur në Shqipëri për të mbledhur informata ushtarake dhe strategjike të sigurisë kombëtare. Të tre të arrestuarit i kundërshtojnë akuzat.
Një muaj më parë, Gjykata e Elbasanit rrëzoi një kërkesë nga autoritetet ruse të mbështetur nga prokuroria, për ekstradimin e Timofevaa-s në Rusi.
