Policia ka zbuluar një parcelë me 855 fidanë kanabis në malin e Brretit. Në kuadër të operacionit “Territor i pastër”, në zonën e Krujës janë zbuluar 5 ambiente të hapura ku kultivoheshin bimë narkotike, në të cilat ishin mbjellë në total 855 fidanë dhe bimë narkotike cannabis sativa.
Fidanët dhe bimët narkotike u agjësuan me anë të djegies, ndërsa një pjesë e vogël e tyre u sekuestrua për t’u ruajtur në cilësonë e provës materiale.
Hetimet vazhdojnë për identifikimin dhe kapjen e autorëve.
“Skuadra të posaçme policore, të përbëra nga efektivë të Komisariatit të Policisë Krujë, Forcës së Posaçme Operacionale të DVP Durrës dhe të FNSH, Tiranë, kanë vijuar kontrollet në zona të pyllëzuara të rrethit, të asistuar dhe nga dronë, me qëllim parandalimin, evidentimin dhe goditjen e veprimtarisë kriminale të kultivimit të bimëve narkotike.
Si rezultat i kontrolleve, gjatë kësaj faze të operacionit policor antikanabis të koduar “Territor i pastër”, në zonën pyjore të malit të Brretit, u konstatuan 5 ambiente të hapura ku u gjetën të kultivuar gjithsej 855 fidanë dhe bimë të dyshuara narkotike cannabis sativa. Fidanët dhe bimët e dyshuara narkotike u agjësuan me anë të djegies, ndërsa një pjesë e vogël e tyre u sekuestrua në cilësinë e provës materiale. Komisariati i Policisë Krujë dhe Drejtoria Vendore e Policisë Durrës vijojnë veprimet e thelluara hetimore, për identifikimin dhe kapjen e autorit/ëve të kësaj veprimtarie kriminale. Kontrollet kundër kultivimit të bimëve narkotike, vijojnë në të gjithë territorin e rrethit.- njofton policia.
Materialet procedurale i kaluan Prokurorisë pranë Gjykatës së Parë të Juridiksionit të Përgjithshëm Durrës, për veprime të mëtejshme, për veprën penale “Kultivimi i bimëve narkotike”.
