Një aksident me gjashtë të plagosur ka ndodhur pasditen e sotme në aksin Qafë Thanë – Prrenjas. Dy prej të lënduarve janë dërguar drejt spitalit të Traumës në kryeqytet për shkak të gjendjes më të rënduar shëndetësore.
Rreth orës 16:20, një autobus është përplasur me një automjet. Për pasojë kanë mbeteur të plagosur të gjithë personat në bordin e makinës tip “Benz”, që është përfshirë nga flakët. Ndërkohë, sipas policisë, nuk ka të plagosur nga ata që udhëtonin me autobus.
Aksidenti
Policia njoftoi se autobusi që drejtohej nga I.A., 51 vjeç, me drejtim lëvizjeje Pogradec – Prrenjas, është përplasur me automjetin tip “Benz”, që drejtohej nga I. M., 28 vjeç, me drejtim lëvizjeje nga Prrenjasi në drejtim të Pogradecit.
Si pasojë e aksidentit, automjeti tip “Benz” është përfshirë nga flakët dhe për pasojë janë dëmtuar drejtuesi i automjetit dhe 5 pasagjerët që udhëtonin me të, të cilët janë transportuar në spital për ndihmë mjekësore.
Nga blutë nuk raportohet për të plagosur nga shoferi apo pasagjerët e autobusit.
“Në vendngjarje ndodhen shërbimet e Policisë Rrugore të DVP Elbasan dhe grupi hetimor, i cili vijon punën për zbardhjen e rrethanave të aksidentit”, mbyllet njoftimi i policisë.
Aksidenti ka shkaktuar bllokim të trafikut në këtë aks.
Shoferi i autobusit: Benzi më preu rrugën
Drejtuesi i autobusit tha për mediat pas aksidentit se makina tip “Benz” i preu rrugën.
“Isha duke zbritur kthesën e Qafë-Thanës, makina që vinte sipër, duke ndërruar marshe, ka marrë kthesën dhe më ka prerë komplet rrugën. Në atë moment makina shpërtheu direkt”, tha ai.
Pasagjerët e autobusit thanë se ishin për vizitë në Jug, e po ktheheshin për në shtëpi.
Edhe disa prej pasagjerëve u shprehën se ishte “Benzi” që i ka ndërprerë rrugën autobusit: “Ne po iknim në Krujë, ishim për vizitë. Autobusi ishte në krah të vet. Në autobus ishim 40 veta. Mjeti i preu rrugën autobusit”.
