Përpara zgjedhjeve lokale të 14 Majit, qeveria dhe kryeministri Rama përdorën çdo metodë dhe makinacion për të bindur qytetarët që të votojnë kandidatët e Partisë Socialiste, përveç presioneve dhe shantazheve.
E tillë duket se ka qenë edhe ulja e herëpashershme e çmimit të hidrokarbureve nga Bordi i Transparencës, i cili vijon të ekzistojë edhe pse nafta në tregun ndërkombëtar ka zbritur në nivelet e paraluftës.
Pavarësisht se çmimi i karburanteve në bursë është stabilizuar dhe ulur ndjeshëm, Bordi komunist i Ramës pse ditë pas zgjedhjeve ka vendosur që të rrisë çmimin e naftës dhe benzinës në vend.
Me vendimin e datës 18 maj, Nafta do të shitet 179 lekë për litrër, pra 6 lekë më shtrenjtë, ndërsa Benzina do të tregtohet me 178 lekë për litrër, çka krahasuar me çmimin e mëparshëm është 5 lekë më shtrenjtë.
Sipas vendimit gazi do të shitet 63 lekë për litër me pakicë, ndërsa shumica 51 lekë për litër për automjetet.
Njoftimi i plotë:
Vendimet e Bordit të Transparencës në datë 18 Maj 2023 kanë ndryshime të çmimit nga ai i përcaktuar në mbledhjen e fundit.
Referuar të dhënave lidhur me bursën Platts të datës 17.05.2023, kemi ndryshime të çmimit nga ai përcaktuar në mbledhjen e fundit, konkretisht rezulton se çmimi (FOB/MED $ Ton) i Benzinës është 791, +19 nga data 09.05.2023, $/ Ton, ndërsa çmimi i Gazoilit/Diesel është 693, +25 nga data 09.05.2023, $/Ton. Kursi i këmbimit i BSH ka pësuar rritje në 105.3 (+3.85 nga data 09.05.2023).
Si rrjedhojë çmimet e vendosura janë :
Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 179 lekë/litri, ndërsa i shitjes me shumicë jo më shumë se 167 lekë/litër.
Çmimi i shitjes me pakicë i nënproduktit benzinë e standardit SSH EN të jetë jo më shumë se 178 lekë/litri, ndërsa i shitjes me shumicë jo më shumë se 166 lekë/litër.
Çmimi i shitjes me pakicë i nënproduktit gaz, të jetë 63 lekë/litri me pakicë dhe i shitjes me shumicë 51 lekë/litër për automjetet.
Çmimi i gazoilit për peshkim është vendosur 85 lekë/litër.
Çmimet e caktuara nga Bordi do të hynë në fuqi në datë 18 Maj ora 18.00, dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.
Bordi i transparencës që në krijimin e tij i është përmbajtur me përpikmëri në vendimet e tij lëvizjes së bursës Platts të Mesdheut për gazoilin, benzinën, si dhe faturave zyrtare të operatorëve.
Ministria e Financave dhe Ekonomisë ndjen detyrimin të sqarojë opinionin publik se jo çdo lëvizje e bursës së naftës bruto reflektohet në të njëjtën kohë dhe në të njëjtën masë në bursën e gazoilit dhe benzinës.
