Një aksident me dy të plagosur është regjistruar mëngjesin e sotëm në aksin nacional Korçë – Pogradec.
Mësohet se në Qafë-Plloçë një automjet është përplasur me një kamion dhe për pasojë, të lënduar kanë mbetur dy persona që udhëtonin me mjetin tip “Mercedes Benz”.
Ata janë dërguar në spitalin e Pogradecit dhe ndodhen jashtë rrezikut për jetën.
“Më datë 18.05.2023, rreth orës 05:15, në aksin rrugor “Korçë-Pogradec”, pranë vendit të quajtur Qafë Plloçë, automjeti kamion tip “Man” me drejtues shtetasin E. Z., është përplasur me automjetin tip “Benz” me drejtues shtetasin A. T. Për pasojë janë dëmtuar shtetasit A. T., 52 vjeç dhe E. T., 30 vjeç, të dy banues në Elbasan, pasagjerë në automjetin tip “Benz”, të cilët ndodhen në spitalin e Pogradecit, aktualisht jashtë rrezikut për jetën”, bën me dije policia.
Për shkak të aksidentit është krijuar bllokim i njërit sens të rrugës, ndërsa policia ndodhet në vendngjarje për hapjen e rrugës si edhe zbardhjen e rrethanave të këtij aksidenti.
Me drejtuesit e automjeteve po kryhen veprimet e mëtejshme procedurale. Grupi hetimor po punon për përcaktimin e shkaqeve të aksidentit.
