Manchester City ka triumfuar 4-0 ndaj Realit të Madridit në gjysmëfinalen e kthimit të Champions League duke rrëmbyer biletën e dytë të finales së Stambollit ndaj Interit.
Kampionët në fuqi të Champions League u dorëzuan pa kushte në Angli, duke mos arritur thuajse në asnjë moment të vënë në vështirësi skuadrën e Guardiola-s.
Për anglezët shkëlqeu portugezi Bernardo Silva me dy gola që në pjesën e parë.
Në të dytën, kur pritej që Reali i Ancelotti-t të reagonte, ishin sërish anglezët që shënuan. Në minutën e 76-të, autogol i Militaos, ndërsa në shtesë rezultati u vulos nga kampioni i botës Alvarez.
Finalja e madhe e Champions League Inter-Manchester City do të zhvillohet më 10 qershor në Stamboll.
