Erion Veliaj do të drejtojë Tiranën në katër vitet e ardhshme, duke u rikonfirmuar në detyrë pas fitores së mandatit të tretë, në një garë ku përballë kishte edhe 5 kandidatë të tjerë nga partitë opozitare.
KQZ ka njoftuar në faqen zyrtare mbylljen e numërimit për 941 Qendrat e Votimit të bashkisë më të madhe të vendit, nga ku Veliaj ka arritur të marrë 158.688 vota, ose 54.69%.
I dyti në këtë garë renditet kandidati i koalicionit “Bashkë Fitojmë”, Belind Këlliçi me 100.351 vota, ose 34.58% të tyre.
Surprizë në këto zgjedhje lokale është Arlind Qori, i cili nën siglën e partisë Lëvizja “BASHKË” të krijuar rishtazi ia ka dalë të renditet i treti pas dy rivalëve kryesore, duke marrë 13835 vota, ose 4.77% të elektoratit në kryeqytet.
Ndërkohë, Partia Demokratike e vulës me kryetar Enkelejd Alibeajn renditet e katërta në Tiranë pasi kandidati i tyre, Roland Bejko ka arritur të marrë vetëm 12.388 vota, ose 4.27%.
Sakaq, Marko Dajti nga “Fronti i Majtë” numëron 2807 vota në total, ose 0.97%, ndërsa Lajla Përnaska nën siglën e PDIU numëron 2104 vota, shifër që e përkthyer në përqindje rezulton të jetë 0.73%.
