Vetëm 24 orë pas mbylljes së procesit zgjedhor të 14 Majit e teksa numërohen ende kutitë e fundit në disa bashki të vendit, ambasadorja amerikanë Yuri Kim ka zhvilluar një takim me trupën e prokurorëve të SPAK.
Ka qenë vetë diplomatja amerikane e vendosur në Tiranë që ka njoftuar takimin e zhvilluar ditën e sotme, duke nënvizuar edhe mesazhin që u ka komunikuar prokurorëve në Prokurorinë e Posaçme.
Kim shkruan në Tëitter se ka ardhur koha që SPAK të intensifikojë përpjekjen kundër korrupsionit, ndërsa ka falenderuar prokurorët, duke i quajtur ata të guximshëm dhe profesionalist.
“Ne shprehim falënderime dhe respekt për këta prokurorë të jashtëzakonshëm për guximin dhe profesionalizmin e tyre në përballjen e korrupsionit dhe krimit të organizuar gjatë 3 viteve të fundit. Tani është koha për të intensifikuar ato përpjekje dhe për t’i dhënë fund mënyrave të vjetra të mosndëshkimit. SPAK po jep gjithnjë e më shumë rezultate që tregojnë se askush – pavarësisht sa i pasur apo i fuqishëm – nuk është mbi ligjin. SHBA do të vazhdojë të mbështesë fuqimisht reformën në drejtësi, përfshirë SPAK-un, sepse duam një aleat të fortë, të sigurt dhe të begatë, dhe sepse besojmë ashtu si populli shqiptar: Shqipëria i përket Europës”, shkruan Kim.
