Rekordmenët e Bundesligës i janë rikthyer “zakonit të vjetër” në lojë e rezultate në kampionat.
Schalke mori nuancat e një kundërshtari pa “shtyllë kurrizore” karshi vendasve, të cilat nuk u treguan aspak të mëshirshëm, duke e dërguar plot 6 herë topin brenda vijës fatale.
Personazhi më i diskutuar në kampin e Bayernit, Thomas Muller, hapi serinë e finalizimeve në minutën e 21-të pas kombinimit të shpejtë me Sanenë.
Vrulli i liderëve u përkthye me një tjetër konkretizim në minutën e 29-të me Kimishin nga pika e penalltisë.
Fraksioni i së dytës “orkestroi” të njëjtat “melodi” nga Muller me shokë. Gnabri u vuri kapak tri pikëve në minutën e 50-të.
Etja e anësorit gjerman bëri që të finalizonte dopietën në hark të shkurtër kohor e për t’i lënë vend në tabelën e shënuesve Til e Mazrauit në çastet e fundit të duelit.
Pas ndeshjes Muller u shpreh:
”Është mirë që u shfrymë në lojë e gola. Puna e treguar së fundmi vjen si rezultat i stërvitjes intensive në seancat e fundit. Zhvillimi është i dukshëm dhe po jep frytet e veta. Do ta konsideroj fitoren dhe mënyrën se si evoluoi takimi si festë të vogël, vërtetë argëtuese. Por jam i bindur se dy testet e mbetura do të jenë krejtësisht ndryshe”, tha futbollisti me numër 25 te kampionët.
THASHETHEMET E LARGIMIT-”Nëse njerëzit thonë diçka për mua është kënaqësi, pasi po më japin rëndësi. Zemra ime rreh vetëm për ngjyrën e kuqe, pra Bajernin dhe Mynihun. Çdo futbollist dëshiron të jetë aktiv nga minuta e parë, ama verdiktin final rreth formacionit fillestar e vendos trajneri. Ne duhet t’i pranojmë rolet tona dhe të tregohemi sa më të gatshëm kur zbresim në fushë. Fakti që flitet shumë në gazeta ndaj meje nuk është diçka e re. Media me 4 shkronja (‘Bild’) përpiqet të nxisë diskutime në mënyrën e vet, pasi kërkon ta shesë veten me hundën time”, tha me mes nervozizmit kapiteni.
GOLI- ”Ishte fillim i gjallë nga ana jonë. Goli na dha qetësinë në rastet vijuese. Shalke performon në një mënyre aspak të këndshme mbi sulmuesit kundërshtarë, pasi ata mbrohen me forca të shumta në zonë dhe është e vështirë të gjesh të çarën, e cila të jep mundësinë e çmarkimit dhe goditjes. I përgëzoj djemtë në interpretimin e sfidës, si në menaxhimin e topit, ashtu edhe të rasteve”.
STOLI-”Tekniku i shpërndan rolet dhe ne i vëmë në zbatim ato. Nëse gjendesh në stol, detyra jote është të mbështesësh ekipin dhe të lësh mënjanë mendimet e këqija rreth minutazhit të pjesshëm. Objektivi është titulli dhe arrihet me kontributin e kolektivit. Liga këtë sezon më duket vërtetë interesante dhe ka marrë ngjyra emocionuese. Të ruaj formën dhe frymën që gjendet mes nesh”, e mbylli prononcimin personazhi më i vjetër i Bajernit nga gjiri i lojtarëve nën urdhrat e Tuhelit.
