Mediat kosovare kanë publikuar pamjet nga aksidenti i trefishtë që ndodhi pasditen e sotme në rrugën nacionale Prishtinë-Pejë dhe vuri në rrezik jetën e 30 nxënësve, të cilët sapo ktheheshin nga një ekskursion i shkollës në Shqipëri.
Siç shihet në videon më poshtë, autobusi ka humbur kontrollin teksa lëvizte në korsinë e shpejtësisë dhe ka “fluturuar” mbi trafik-ndarëse, duke u përplasur me një kamion dhe një makinë.
Ngjarja që shkaktoi lëndimin e 30 nxënësve ndodhi rreth orës 15:50 të pasdites.
Paraprakisht, shkak i ngjarjes dyshohet të jetë bërë shpejtësia përtej normave të lejuara e autobusit, mosrespektimi i sinjalistikave rrugore ose parakalimi i gabuar.
Në Qendrën Klinike Universitare, 13 pacientë kanë marrë trajtime pas aksidentit që ndodhi në Vragoli. Në lidhje me ngjarjen, mjeku Naser Syla tha se gjendja e të plagosurve është stabile dhe të gjithë kanë lënë spitalin për të shkuar në shtëpi.
“Janë sjellur 13 persona prej aksidentit ku 7 prej tyre janë nxënës. Të gjithë e kanë marrë trajtimin dhe gjithë janë lëshuar në shtëpi pasi s’kanë pasur lëndime të rënda”, tha Syla për mediat kosovare.
Autobusi i përfshirë në këtë aksident ishte duke transportuar nxënës nga Presheva pas një ekskursioni në Shqipëri.
