Asfalti elektoral krijon përshtypjen sikur po mbin me magji këto ditë të fushatës. Nga Veriu në Jug, në diell e në shi, kryebashkiakët socialistët duken në garë për të shtruar sa më shumë zift elektoral, në atë që cilësohet gjegjësisht si një përpjekje e ulët për të ndikuar te votuesit para lokaleve të 14 Majit.
Kishin kishin kaq shumë kohë në dispozicion, pse rrugët që janë lënë në harresë gjatë gjithë mandatit shtrohen me kaq shpejtësi pak para zgjedhjeve? Kjo mënyrë qeverisjeje, që qartazi e trajton qytetarin si një statistikë në rezultain e përgjithshëm të zgjedhjeve, duket se ka irrituar banorët e Velabishtit në Berat. Gjatë orëve të vona të mbrëmjes së djeshme, ata kanë ndaluar një mjet që hidhte asfalt elektoral, ndërsa kanë njoftuar dhe kandidatin e opozitës për Beratin Zija Ismaili lidhur me zhvillimit.
Ky i fundit, pasi ka shkuar në vendngjarje ka konstatuar se një mjet pa targa me mbishkrimin “Shkëlqimi 07” po shtronte rrugën, ndërkohë që nuk ka pasur asnjë tabelë informuese për punimet. Firma “Shkëlqimi 07”, sipas të dhënave në QKB, rezulton me pronar Shkëlqim Kapllanajn, vëllait të kandidatit të PD-së së vulës në Mallkaster, Agron Kapllanaj.
“Në njësinë administrative të Velabishtit, një nga njësitë më të mëdha në Berat. Po kthehesha nga një takim elektoral dhe më thonë që ka një denoncim nga qytetarët se në Velabisht ka ardhur një mjet pa targa që po hedh bitum. Është hera e dytë që e bëjmë këtë denoncim. Vijmë këtu bashkë me dy deputetët e qarkut të Berat. Nuk ka asnjë tabelë informuese për punimet në këtë rrugë, sipas ligjeve në fuqi. Tabela duhet të tregonte datën e fillimit të punimeve, përfundimin e punimeve, kush është firma që bën punimet. banorët janë shumë të irrituar pasi nuk ka transparencë për punimet që po bëhen. Ne erdhëm menjëherë, ndaluam shoferin dhe i kërkuam të na thotë pse në këtë orë punime dhe në emër të kujt. Më pas erdhën makina të shumta policie, oficerë të operacionales, civilë dhe të policisë së Shtetit”, tha Ismaili përmes një komunikimi publik të shpërndarë në rrjetet e tij sociale.
Në një prej videove të publikuara, ai shihet duke debatuar me forcat “Shqiponja” që janë stacionuar në zonë, ndërsa e cilëson të pazakontë prezencën e tyre aty.
“U njoftua se është bllokuar rruga. Pse duhet të vijë Forca Operacionale këtu?! Mjeti që ka bllokuar rrugën, ky ‘Shkëlqimi 07’ duhet ti marrë dokumnetat, të vijë policia e qarkullimit rrugor të bëjë veprimet, siç e ka ligji. Asnjë nga ju s’jeni kompetent për denoncimin e bërë”, u thotë ai efektivëve të speciales, që duket se janë të vendosur të zbatojnë një porosi nga ‘lart’ për të ushtruar një formë presioni ndaj qytetarëve denoncues dhe kandidatit të opozitës me prezencën e tyre.
Më tej, Zija Ismaili pyet efektivet që pse nuk ndalojnë drejtorin e bashkisë Bledar Çili, për të cilin tha se pas konsumimit të birrave në lokal, lëviz me makinë i dehur.
Në një mesazh për qytetarët, Ismaili u bën qytetarëve apel për ta votuar për të sjellë një tjetër model qeverisje.
“Ervin Demo vazhdon të na mashtronte me bitumin e tij ilegal! Nuk ka asnjë respekt për banorët e Velabishtit, që vuajnë nga rrugët e keqija dhe infrastrukturën e varfër. Ai hedh bitum në mes të natës dhe në kohë me shi, duke shpresuar se ne nuk do ta shohim. Por beratasit janë të zgjuar dhe nuk do të lejojnë të gënjehen më! Mjaft me skandalet e tij! Mjaft me abuzimet e tij! Mjaft me arrogancën e tij! Në 14 maj do ta dërgojmë atë në shtëpi dhe do ta zgjedhni një kryetar që do të dëgjojë dhe do të respektojë popullin! Bashkohuni me ne për të ndryshuar Beratin për mirë”, shprehet ai.
