Arif Tafani është në kërkim të një mandati të 6-të si kryebashkiak i Belshit në lokalet e 14 majit, ndërsa përballë ka kandidatin e opozitës Bedri Qypin, ish-kryetar i komunës Fierzë.
Gara pritet e fortë nisur nga rezultatet që ka prodhuar Belshi në zgjedhjet e mëparshme dhe njësitë administrative Grekan, Kajan, Fierzë dhe Rrasë.
Arif Tafani u zgjodh fillimisht kryetar i bashkisë së qytezës së Belshit në vitin 2000 dhe fitoi zgjedhjet më 2003 dhe 2007. Në vitin 2011 u mund nga ish-kryebashkiaku demokrat, Asqeri Kuqja.
Tafani u rikthye si kandidat përballë Kuqjes dhe mori një fitore të ngushtë në 2015-ën, pavarësisht se kësaj here garonte si kandidat i koalicionit Aleanca për Shqipërinë Europiane, ku përfshihej Partia Socialiste dhe Lëvizja Socialiste për Integrim.
Pjesëmarrja në lokalet e 2015-ës ishte 41%, me Arif Tafani që mori 4 306 vota, kundrejt rivalit i cili u votua 3 568 herë.
Diferenca 738 vota, ndryshimet e përbërjeve të koalicioneve, konsumimi i pushtetit, janë faktorë që lënë vend për një rezultat të hapur në lokalet e së dielës.
Problemet me pasurinë dhe tenderat
Një analizë ekonomike që merrte në shqyrtim pasuritë e deklaruara të Arif Tafanit, publikuar nga “Birn” para zgjedhjeve lokale të stilit monist në 2019-ës, zbulonte probleme me justifikimin e pasurisë me burime të ligjshme për kryebashkiakun e Belshit.
Ai rezultonte në pamundësi financiare për të justifikuar me burimet e deklaruara shtesën e pasurisë për vitet; 2005 në vlerën 340 mijë lekë, 2014 në vlerën 3.2 milionë lekë dhe 2015 në vlerën 325 mijë lekë. 3.9 milionë lekë (të reja) në total.
Raportimet për procedura prokurimesh të dyshimta kanë qenë të hëpërhëshme në media. Tendera pa garë, me dyshime të paracaktuar e korruptivë të dhëna nga bashkia e drejtuar nga Tafani, janë raportuar në hapësirën mediatike.
Për çështjen e prokurimeve, ndaj tij u depozitua edhe një kallëzim në prokuroi nga Kontrolli i Lartë i Shtetit në vitin 2018, pas një auditimi për dy vitet paraardhëse.
“Shkelje e barazisë së pjesëmarrësve në tender apo ankande publike” dhe “Shpërdorimi i detyrës” ishin akuzat e ngritura nga kryebashkiakut dhe zyrtarëve të bashkisë. Sipas auditit, ata shkaktuan një dëm ekonomik prej 80 milionë lekësh në buxhet, ndërsa përdorën në mënyrë të paefektshme 286 milionë lekë dhe i shkaktuan një mungesë të ardhurash bashkisë prej 66 milionë lekësh.
Auditimi i KLSH-së zbuloi 10 procedura të prokurimit me probleme dhe 4 procedura të zbatimit të punimeve.
“Gjatë auditimit u konstatuan shkelje dhe parregullsi të dispozitave ligjore në fushën e prokurimit publik, kryesisht në përzgjedhjen e procedurës së prokurimi, vlerësimin e ofertave ekonomike duke vepruar me dy standarde vlerësimi, zbatimin e investimeve etj,” do të konstatonte asokohe KLSH.
Vetë Arif Tafani i hodhi poshtë akuzat. Që prej asaj kohe, prokuroria e Elbasanit ka heshtur lidhur me fatin e hetimeve ndaj Arif Tafanit, i cili kërkon një mandat të gjashtë si kryetar bashkie.
