Në Kurbin pasditen e sotme është zhvilluar takimi përmbyllës elektoral i koalicionit opozitar “Bashkë Fitojmë”, me Sali Berishën dhe Ilir Metën që u kanë bërë thirrje qytetarëve për të votuar Behar Haxhiun ditën e dielë.
Ndërkohë, në fjalën e tij, Haxhiu tha se do të jetë gjithnjë në krah të banorëve të qytetit dhe do të përmbushë pritshmërinë e tyre.
“Sot jemi në fund të fushatës, ndaj për secilin prej jush kam një falënderim të përzemërt. Ju premtoj se çdo ditë në krye të detyrës do të jem në lartësinë dhe pritshmërinë tuaja. Unë nuk jam njeri i fjalëve pasi gjithë jetën kam punuar, dhe për mua flasin puna dhe eksperienca.
Më 14 maj Kurbini do jetë në ballë të betejës për të mbrojtur pluralizmin. Mbështetje për shtresat në nevojë, të moshuarit dhe rininë. Në këtë 4 vjeçar do të mbyllim plagët e tërmetit duke finalizuar projektin e rindërtimit. Prioritet do jetë bujqësia dhe blegtoria. Do asistojmë fermerët dhe blegtorët”, u shpreh kandidati opozitar.
