Investimi më i rëndësishëm i socialistëve në Elbasan dhe arritja më e madhe për qeverinë në këtë bashki është ndërtimi i Inceneratorit me vlerë 24 milionë euro.
Mund të duket hipokrizi dhe cinizëm i theksuar, por ishte vetë kryeministri Edi Rama që aferën e Djegësit, i cili ende mbetet në remont dhe nuk i trajton 120 tonë mbetje urbane të 7 bashkive të qarkut siç parashikohej në kontratën koncesionare, e shiti si sukses në takimin përmbyllës elektoral të mbrëmjes së djeshme në Elbasan.
Përkrah Gledian Llatjas, i cili për ironi të fatit vetëm më 7 prill, para nisjes së fushatës elektorale u kujtua se Inceneratori është jashtë funksionit dhe në mediat e majta njoftoi ndezjen e rikthimin në punë, Rama u tall hapur me popullin e Elbasanit, duke kërkuar të ecin “Përpara” me një nga skandalet më të rënda të qeverisë së tij.
Shefi i qeverisë nën ritmet e tallavasë u foli qytetarëve për inceneratorin e ndërtuar në Elbasan me krenari, edhe pse për këtë aferë gjenden pas hekurave ish-Ministri i tij i Mjedisit, Lefter Koka apo ish-deputeti Alqi Bllako e 10 zyrtarë publikë.
Gjatë kohës që Rama fliste regjia qendrore shfaqi pas krahëve të tij imazhe të makinerive dhe punëtorëve që bëjnë seleksionimin e mbetjeve dhe e mbrojti inceneratorin që nuk prodhoi kurrë energjinë e premtuar.
Ndërkohë, kryeministri sulmonte kandidatin e koalicionit “Bashkë Fitojmë”, Luçiano Boçi, i cili gjatë fushatës ka premtuar fikjen e Inceneratorit, që e konsideron një fantazmë industriale dhe rivlerësimin e zgjidhjes së përpunimit të mbetjeve në Elbasan.
Në videon më poshtë, Rama dëgjohet të thotë: “Është i madh ai (Luçiano Boçi). Po kur tha? “Do ta mbyll, tha impiantin e mbetjeve…”. Ne shyqyr e vumë në punë. “Do ta mbyll, tha le të digjen plehrat në natyrë se është më higjenike”. Normal, do një mal me plehra që të digjet atje për të bërë ndonjë film, se është shesh xhirimi këtu. E për të dalë ai atje, Koçi i teto Ollgës e për të bërë nai serenatë. Hyp sipër non gratës e tu ardh vërdallë bashkë me kalin e vet. Këto janë të gjitha mënyrë për të thënë se ata nuk i duhen dreqit e jo mo t’i duhen Elbasonit…”.
Pavarësisht se çështja ka kaluar për gjykim në Gjykatën e Posaçme Antikorrupsion dhe SPAK e ka referuar ndërtimin e inceneratorit të Elbasanit si një çështje korruptive, Rama “i dehu” militantët me suksesin e kësaj afere.
Ndërkohë që shefi i qeverisë gjen guximin të kërkojë vota e të krenohet me imazhet e një afere korruptive dhe të normalizojë hapur rryshfetin, çështja për inceneratorin e Elbasanit është ende në gjykim, ndërsa Lefter Koka dhe Alqi Bllako kanë pranuar gjykimin e shkurtuar dhe pritet të dënohen së shpejti.
Lefter koka, ish-ministër i qeverisë Rama akuzohet se përfitoi rreth 3.7 milionë euro ryshfet nga tre administratorët e kompanisë Albtech Energy, Klodian Zoto, Mirel Mertiri e Stela Gugallja për dhënien me koncesion dhe ndërtimin e inceneratorit të Elbasanit.
Pas arrestimit të Lefter Kokës dhe Alqi Bllakos, kryeministri Rama hoqi çdo përgjegjësi nga vetja dhe Partia Socialiste duke u distancuar prej tyre me shprehjen “përgjegjësia është personale”.
Ai foli për Kokën si një zyrtar që këpuste “dardha dhe mollë për t’i futur në trasta mbas shpinës” së tij, por duket se në kulmin e fushatës çdo makinacion është i vlefshëm dhe në dobi të makinerisë elektorale që mbledh vota në Elbasan, madje me disa imazhe të kuruara dhe fyerje për kundërshtarin edhe grabitja me firmë e vulë e 24 milionë eurove të Inceneratorit mund të normalizohet e t’i bashkëngjitet moto e fushatës “Përpara!”.
