Debati në fushatën elektorale për zgjedhjet e Majit edhe pse në shumicën e bashkive u kërkua me ngulm nga kandidatët e koalicionit opozitar “Bashkë Fitojmë”, u refuzua nga kryebashkiakët socialistë.
Teska fotot e kandidatëve të selisë rozë mungojnë edhe në posterat zyrtarë e kudo shfaqet imazhi i kryeministrit Edi Rama, ndërsa diskursin politik e dominon tallavaja “Vetëm përpara”, shqiptarët edhe këtë herë u privuan nga debati mbi programet.
Lidhur me këtë element të fushatave elektorale në Shqipëri, analisti Lutfi Dervishi me një analizë të shkurtër ka ironizuar mungesën e debatit.
Ai thekson se nuk ka arsye për debat, kur sot pas 30 vitesh problemet janë po të njëjtat, duke filluar nga uji i pijshëm, çerdhet, shkollat, infrastrukturat, taksat e biznesit si edhe shumë të tjera.
Gjithashtu Dervishi shprehet se nuk ka debat mbi alternativat në një kohë kur fushata u dominua në treçerekun e saj nga diskutimet mbi Big Brother.
Postimi i Dervishit:
Arsyet pse nuk pati debate në fushatë!
E para, nuk ka pse të bëhet debat, kur prej 30 vjetësh problemet jane po ato:, uji i pijshëm, çerdhe, shkolla, infrastruktura, taksat e biznesit etj.
E dyta, debati është një gjë e vjetër që i përket së shkuarës, më saktë shekulli XX. Sot është koha për këngë, valle, dhe në zgjedhjet e ardhshme mund të kalojmë te baleti dhe opera.
E treta, debati është humbje kohe. Marksi në shekullin e XIX thoshte se njeriu është kapitali më i çmuar. Sot kapitali më i çmuar është koha e njeriut. Njerëzit janë të zënë me probleme më të rëndësishme në rrjetet sociale!
E katërta, zotërinjtë e vërtetë nuk shahen më në televizion dhe në sheshe, por në facebook, instagram, tik tok. .
E pesta, është provuar se zgjedhjet fitohen duke mos folur asnjëherë seriozisht.
E gjashta, nëse zbulohen, sot, gjithë planet në fushatë, me çfarë do të surprizohen votuesit nesër në qeverisje?
E shtata, këtë radhë fushata përkoi me gjysmëfinalet e Champions League dhe çerek finalet e Europa League. Për më tepër treçereku fushatës përkoi edhe me Big Brother.
