Kandidati i koalicionit Bashkë Fitojmë në Durrës, Igli Cara deklaroi në takimin përmbyllës të fushatës së ndryshimi do të nisë përmes votës së qytetarëve.
Ai u shpreh se Durrësi ka shpirtin dhe forcën e duhur për t’i dhënë goditjen e duhur bandës së Edi Ramës. Cara u shpreh se administrate e drejtuar prej tij do të ketë prioritet mirëqenien dhe shëndetin e qytetarëve.
“Ne së bashku kemi bindjen që ndryshimi i madh më 14 Maj do të nisë përmes votës tuaj sepse Durrësi ka forcën dje shpirtin t’i kapë goditjen bandës së Edi Ramës. Do punojmë me besimin në Zot dhe te njëri tjetri. Ne së bashku do kemi prioritet të parë mirëqenien dhe shëndetin e qytetarëve dhe për këtë do hartojmë një sërë politikash. Duke krijuar më shumë mundësi për fëmijët dhe të rinjtë dhe duke mbështetur çdo familje pavarësisht ku jeton.
Do të punojmë për integrimin e zonave të reja urbane. Mbrojtja e mjedisit do të shndërrohet në një komponent kryesor të zhvillimit. Do japim prioritet menaxhimit të buxhetit të bashkisë. Do garantojmë transparencë dhe eficencë në mbledhjen e taksave. Ne së bashku do punojmë fort për ta kthyer Durrësin në bekim të Zotit duke bashkëpunuar me investitorët dhe duke u përpjekur të bëjmë gjithçka që bashkia ka për detyrë të bëjë”, tha Cara.
