Një ngjarje tragjike është regjistruar në zonën e Valbonës pasditen e kësaj të marte.
Sipas një njoftimi të shpërndarë për mediat nga policia e Kukësit, dy turiste kanë humbur jetën, pasi janë rrëzuar në greminë, në një zonë të thepisur.
Bëhet me dije trupat e pajetë të dy turisteve, një belge me inicialet B. M., dhe një franceze, me inicialet J. B., janë gjetur pas shumë kërkimesh.
Uniformat blu me ndihmën e skuadrës aklpine të FNSH-së kanë nisur një operacion për nxjerrjen e trupave të dy turisteve, por moti i keq me mjergull dhe borë deri më tani e ka bërë të pamundur që helikopteri të ulet në vendin ku janë gjetur të pajeta.
NJOFTIMI I POLICISË:
Pas njoftimit se dy turiste të huaja, duke eksploruar zonën e Valbonës, ishin rrëzuar për shkak të terrenit të thepisur dhe kishin rënë në greminë, shërbimet e Komisariatit të Policisë Tropojë, ato të Drejtorisë Vendore dhe të Policisë Kufitare, së bashku me ekipin mjekësor, janë nisur menjëherë në drejtim të vendit ku kishin rënë dy turistet.
Pavarësisht territorit shumë të vështirë dhe motit të keq me mjegull dhe me borë, shërbimet e Policisë, pas shumë kërkimesh, kanë bërë të mundur që në vendin e quajtur ‘Qafë Valbonë’, të gjenin trupat e pajetë të dy turisteve, shtetases belge B. M. dhe shtetases franceze J. B.
Në ndihmë të shërbimeve policore është nisur menjëherë skuadra alpine e FNSh Shkodër, pasi për shkak të terrenit shumë të vështirë dhe motit të keq, punonjësit e Policisë që ndodhen në vendngjarje, e kanë të pamundur nxjerrjen e trupave nga humnera. Po për shkak të motit të keq, edhe helikopteri nuk ka mundur të ulet në vendin ku janë gjetur të pajeta turistet.
Për të mundësuar nxjerrjen e trupave të pajetë, shërbimet e Policisë vendore dhe të asaj kufitare, si dhe skuadra alpine, po bashkëpunojnë me Emergjencat Civile dhe me Ministrinë e Mbrojtjes.
Grupi hetimor i Drejtorisë Vendore të Policisë Kukës ndodhet në vendngjarje dhe në drejtimin e Prokurorisë, po punon për zbardhjen e rrethanave të kësaj ngjarjeje dhe për përcaktimin e shkakut të humbjes së jetës së dy turisteve.
