Të shtëna me armë zjarri janë shënuar gjatë natës në Pukë. Sipas informacioneve paraprake, është qëlluar në ajër nga një automjet tip “Maserati” në lëvizje.
Policia ka shpallur në kërkim personin e dyshuar që qëlloi me armë, 26-vjeçarin Klaudio Prendi.
“Shërbimet e Komisariatit të Policisë Pukë, me marrjen e njoftimit, në mesnatë, rreth orës 00:20, se në dalje të qytetit të Pukës në aksin rrugor Pukë-Fushë Arrëz, ishin dëgjuar të shtëna me armë, menjëherë kanë shkuar në vendngjarje. U bë e mundur identifikimi i autorit të dyshuar të kësaj ngjarje dhe shpallja në kërkim e shtetasit K.P., 26 vjeç, banues në Tiranë. Gjithashtu u bë identifikimi dhe shpallja në kërkim dhe e automjtetit nga i cili ky shtetas ka qëlluar në ajër, duke qënë në lëvizje”, thuhet në njoftimin e policisë.
Kryebashkiaku i Pukës dhe kandidati i PS për zgjedhjet lokale, Gjon Gjonit nëpërmjet një postimi në rrjete sociale, shprehet se ngjarja ka sfond politik. Sipas tij, mbështetësit e PS janë kërcënuar me armë dhe për këtë akuzoi kundërshtarin politik.
“Pasi kanë kërcënuar mbështetës të Partisë Socialiste duke ju drejtuar dhe armen, në largim e sipër, nga mjeti me të cilin ata leviznin është qëlluar në ajër. Por a mund t’ju bëhet presion pukjanëve në shtëpinë e tyre?! Këtë ta harroj Rroku që mendon se mund të marr bashkinë nën presionin e armëve. Ja pra vizioni dhe strategjia përmes të cilës ai kërkon të vi në pushtet”, u shpreh.
Ndërsa kandidati i “Bashkë Fitojmë”, Rrok Dodaj hodhi akuza ndaj Gjonit, duke deklaruar se përmes grupeve të armatosura synon të shantazhojë banorët.
“Sa më shumë i afrohemi 14 majit, banda që ka drejtuar pushtetin vendor prej 8 vitesh, me në krye narkotrafikantin Gjon Gjonaj, përmes grupeve të armatosura, të cilat i strehon në Hotel Turizëm Puka, synon të ushtrojë presion dhe shantazh mbi banorët pukjan. Të frymëzuar nga etërit e tyre politikë, që pushteti mbahet me grykën e pushkës, natën e mbrëmshme, killera me pagesë që vërtiten të armatosur rrugëve të qytetit, duke i bërë karshillëk policisë së shtetit, kanë tentuar të intimidojmë qytetarë të lirë dhe mbështetës të opozitës”, shkroi ai në një postim në rrjetet sociale.
