Një plan i ri urbanistik për qytetin e Lezhës që ka marrë miratimin e kryeministrit Edi Rama dhe ministres së Infrastrukturës Belinda Balluku, parashikon shembjen e stadiumit ku zhvillon ndeshjet klubi i futbollit “Besëlidhja”.
Stadiumi, pavarësisht mungesës së investimeve është një ndër pasuritë e Lezhës dhe për t’a mbrojtur nga rruspat e “Rilindjes” që kërkon ta kthejë fushën e blertë në shesh ndërtimi për parkim dhe pallate, kandidati i koalicionit “Bashkë Fitojmë”, Pashk Gjoni ka kërkuar votën e qytetarëve të tij më 14 Maj.
Kandidati i opozitës me një postim në rrjetet sociale i ka bërë thirrje bashkëqytetarëve të tij të mos lejojnë shembjen e stadiumit “Besëlidhja” dhe ta ndalojnë me votë vendimin absurd të pushtetit vendor dhe të qeverisë.
“Të nderuar banorë të Lezhës! Le të bëhemi të gjithë bashkë, pa asnjë dallim partiak për të shpëtuar kasaphanën me historinë e qytetit.
Rilindasit në ikje nga bashkia që nuk kanë asnjë lidhje me Lezhën, në ditët e fundit kanë marrë vendimin për shembjen e stadiumit “Besëlidhja” dhe për të ndërtuar objekte dhe parkingje. Duke qenë në kufijtë e absurditetit, institucioni i Prefektit, konfirmon vendimin brenda 24 orësh që i dërgohet nga bashkia dhe drafti i është paraqitur Kryeministrit.
Jam zotuar se nuk do ta lejoj shembjen e stadiumit, ndaj me 14 Maj, le të bëhemi bashkë për të sjellë ndryshimin dhe zhbëjmë çdo vendim të një pakice në ikje. Bashkë shpëtojmë Lezhën”, shkruan Gjoni në mesazhin që u ka dërguar sot qytetarëve të Lezhës.
