Një incident është regjistruar ditën e djeshme në një shkollë në zonën e Farkës, në kryeqytet.
Policia ka publikuar një njoftim për ngjarjen pas 24 orësh, duke bërë me dije se ka proceduar penalisht një 20-vjeçar pasi ka qëlluar në ajër, me një pistoletë imituese.
20-vjeçari është futur në oborrin e shkollës dhe ka qëlluar me “armën imituese” duke shkaktuar panik.
“Specialistët për Hetimin e Krimeve të Komisariatit të Policisë Nr. 1 referuan materialet në Prokurori dhe nisi procedimi penal për shtetasin F. Sh., 20 vjeç, sepse më datë 04.05.2023, në oborrin e një shkolle, në Farkë, Tiranë, ka qëlluar në ajër, me një pistoletë imituese të zhurmës së armëve. Pistoleta imituese u sekuestrua në cilësinë e provës materiale”, njofton policia.
Materialet në ngarkim të tij i kaluan prokurorisë për veprime të mëtejshme hetimore, ndërkohë që 20-vjeçari do të hetohet në gjendje të lirë.