Dy të rinj nga Kosova janë arrestuar në Morinë pasi në bagazhin e automjetit me të cilën tentuat të kalonin kufirin për të hyrë në Shqipëri, u gjet një vajzë 14 vjeçe.
Sipas bluve, qëllimi ishte që e mitura të kalonte kufirin në kundërshtim me ligjin.
Policia njoftoi se shërbimet në PKK Morinë kanë kaluar në vijën e dytë për kontroll më të detajuar automjetin tip “BMW”, me drejtues shtetasin A.M. dhe pasagjer shtetasin N.K..
“Gjatë kontrollit të ushtruar në bagazhin e këtij automjeti, shërbimet e Policisë gjetën të fshehur një shtetase 17 vjeçe, banuese në Prishtinë, e cila dyshohet se po ndihmohej nga këta 2 shtetas, për të kaluar kufirin, në kundërshtim me ligjin. Nga verifikimet ka rezultuar se 17-vjeçarja kishte tentuar edhe më parë të hynte në vendin tonë, por për shkak të moshës, nuk ishte lejuar të hynte e pashoqëruar, sipas përcaktimeve ligjore në fuqi”, thuhet në një njoftim të bluve.
Shoferi dhe pasagjeri në mjet, të dy të moshës 23 vjeç dhe banues në Prishtinë, u arrestuan për veprën penale “Ndihma për kalim të paligjshëm të kufijve”.
