Partia Demokratike e Vulës, me kryetar të komanduar Enkelejd Alibeajn, e cila është njohur si subjekt zgjedhor dhe ka përfituar 1 milionë euro nga ndarja e fondeve në KQZ për zgjedhjet lokale të 14 majit, ende nuk ka komisionerë të përcaktuar për disa Qendra Votimi.
“Dehja” nga suksesi që Alibeaj premton se do të korrë në 2025 dhe nga të ardhurat që ka përftuar në prag zgjedhjesh (2 milionë euro vetëm nga shpërndarja e fondit vjetor për partitë në fillim të prillit) duket se i ka bërë demokratët e Vulës që të mos shqetësohen për mënyrën si do të numërohen votat e tyre.
Edhe pse KQZ sipas ndarjes së komisionerëve përcaktoi se dy prej tyre në tavolinë do t’i takojnë PD-së Vulës,, Alibeaj ende nuk ka çuar listën me emrat e propozuar dhe dokumentet për anëtarë në disa KQV, duke shkelur afatet e përcaktuara në nenin 36 pika 2 të ligjit nr.10019, datë 29.12.2008 “Kodi Zgjedhor i Republikës së Shqipërisë, i ndryshuar.
Në këto kushte është hedhur në veprim Partia Socialiste, që nëpërmjet Sekretarit për Çështjet Ligjore e Zgjedhore, Eridian Salianji i kërkon KQZ-së të emërojë anëtarë kryesisht në këto KQV të braktisura prej grupit “Alibeaj”.
“Së fundmi, jemi vënë në dijeni se në disa Komisione të Zonave të Administrimit Zgjedhor, subjekti zgjedhor “Partia Demokratike” ende nuk ka dërguar propozimet dhe dokumentet për anëtarë në Komisionet e Qendrave të Votimit, në tejkalim te afateve të përcaktuara në nenin 36 pika 2 të ligjit nr.10019, datë 29.12.2008 “Kodi Zgjedhor i Republikës së Shqipërisë, i ndryshuar.
Nisur nga sa më sipër, me qëllim garantimin e një procesi të rregullt zgjedhor në përputhje me standardet e legjislacionit në fuqi, lutemi :
Të na vini në dispozicion një kopje të vendimit të Komisionerit së bashku me listën e personave që mund të emërohen kryesisht për të plotësuar vendet vakante për anëtar dhe sekretar të KQV-së, sipas përcaktimeve të nenit 36 të Kodit Zgjedhor, të ndryshuar dhe nenit 11 të udhëzimit nr. 2, datë 5.12.2020, të Komisionit Rregullator, “Në caktimin e procedurave të përzgjedhjes dhe trajnimit të shtetasve që mund të emërohen kryesisht për plotësimin e vakancave në Komisionet e Zonës së Administrimit Zgjedhor dhe Komisionet e Qendrave të Votimit”, i ndryshuar”, thuhet në kërkesën drejtuar KQZ-së.
