Lefter Alla, ish-kryebashkiak i Bulqizës, përfundoi në pranga për një tender prej rreth 3 milionë euro, por përmes mbrojtjes së tij, vijon të insistojë në një masë më të butë sigurie, për shkak të gjendjes së rënduar shëndetësore.
Mbrojtja e tij tha se Alla trajtohet prej disa kohësh për problemet që ka me zemrën, ndërsa qëndrimi në qeli shtoi ajo, i rrezikon shëndetin.
Gjykata e Posaçme vendosi ditën e sotme të caktojë dy ekspert mjeko-ligjor që do të përcaktojnë nëse pretendimi i të arrestuarit qëndron.
Hetimet
Trembëdhjetë persona, përfshirë Lefter Allën dhe zyrtarë të tjerë të Bashkisë Bulqzië janë arrestuar, sipas SPAK. Ndaj 11 prej tyre, sipas akuzës, GJKKO caktoi me kërkesë së SPAK masat e arrestit me burg më 14 Mars, që u ekzekutuan nga policia dy ditë më vonë (megjithatë çuditërisht, ndaj njërit prej tyre masa nuk u ekzekutua pavarësisht pretendimit të SPAK). Ndërsa ndaj dy të tjerëve u ekzekutua masa e arrestit shtëpiak.
Prokuroria bën me dije se nga hetimi, ka rezultuar se për shtetasin nën hetim Lefter Alla me detyrë Kryetar Bashkie me funksionin e tij si i zgjedhur vendor për të administruar konform ligjit Njësinë vendore Bashkinë Bulqizë, evidentohet qartësisht sjellja e tij duke dokumentuar disa fakte penale si shkeljet gjatë procedurës së prokurimin publik me procedurë të hapur në datë 30.04.2021, operatorëve ekonomikë “Egland Sh.p.k” dhe “BE-IS” Sh.p.k, me objekt “Ndërtimi rrjetit furnizimit dhe rrjetit shpërndarës Ujësjellësi dhe ndërtimi i rrjetit të KUZ, Lagja e vjetër, qyteti Bulqizë, Bashkia Bulqizë”, me vlerë të tenderit në shumën 322.439.000 lekë të reja, me afat kohor 10 mujor.
Alla në bashkëpunim me nënkryetaren e Bashkisë, dhe punonjësit e tjerë, si specialiste e prokurorimeve, anëtarët e KVO, kanë bërë të mundur që këtë tender ta fitonte me dokumentacion “BOE Egland shpk” dhe “BE-IS shpk”, duke krijuar avantazhe për këtë subjekt gjatë procedurës së prokurimit, shton SPAK në një njoftim zyrtar. Nga hetimi ka dyshime të arsyeshme të bazuara, se punimet janë kryer nga “OE 2AF Albania shpk”, lidhje shoqërore e kryetarit të Bashkisë.
