Endrit Sinaj, një 29-vjeçar nga Vlora – disa herë i skeduar nga policia në vendlindje, është ekzekutuar me armë zjarri në Spanjë.
I riu, i cili ka disa hesape të hapura me drejtësinë shqiptare, është qëlluar me plumba në bark më 23 prill dhe u braktis në duart e mjekëve në spitalin e “Trueta-s” në Girona, ku edhe ndërroi jetë si pasojë e plagëve të marra.
Mediat vendase raportojnë se Endrit Sinaj përveç dosjes kriminale në Shqipëri, rezulton i arrestuar për drogë në Spanjë dhe kishte vetëm pak ditë që ishte liruar me kusht nga burgu.
Viktima rezultonte se kishte qenë i arrestuar bashkë me një bashkatdhetar në kuadër të një operacioni të lidhur me trafikun e marijuanës në Marbella.
Sinaj ishte arrestuar në La Selva dhe gjykuar në Blanes, me një vendim i cili më pas u pezullua nga një gjykatë në Marbella, që i dha atij liri të përkohshme, ndryshe nga bashkëatdhetari i tij, i cili u burgos.
Më 23 prill, ishte pikërisht një bashkatdhetar ai që e la të plagosur për vdekje para spitalit të Truetës.
I riu kishte marrë një plumb në bark që i shkaktoi vdekjen, por policia spanjolle ende nuk ka dhënë sqarime për vendin ku ndodhi ngjarja, apo informacion mbi autorin e krimit.
Ditën e parë, falë targës së makinës që kishin kapur kamerat, policia gjeti shqiptarin (rreth 30 vjeç) që e kishte lënë Sinajn të dergjej në duart e mjekëve, në urgjencën e Truetës.
Ai i shpjegoi agjentëve të “Mossos” se ai e kishte marrë të plagosurin në anë të rrugës, por nuk dha asnjë informacion të mëtejshëm, megjithëse u dërgua në stacionin e policisë në Girona dhe u mor në pyetje për një kohë të gjatë.
Shqiptari iu kontrollua edhe shtëpia e tij në Tordera, por nuk u konsiderua se kishte lidhje me krimin dhe ai u lirua e madje të nesërmen iu kthye edhe makina, një Seat Córdoba, me të cilën ai kishte çuar viktimën në “El Trueta”.
Kush është viktima?
Sa i përket Endrit Sinajt, ai kishte edhe llogari të hapura me drejtësinë në Shqipëri. 29-vjeçari ishte pjesë e një grupi prej 5 personazh që u arrestuan në tetor 2020 në qytetin e Vlorës.
Sinaj dhe grupi i tij pasi kishin kontrolluar objektivin e tyre Fidel Caushi, me dronë, mësynë në shtëpinë e tij në fshatin Kropisht të Selenicës, të veshur me kapuç, të armatosur dhe duke u shtirur si policë për t’a grabitur.
I zoti i shtëpisë dhe djali i tij për të shmangur vjedhjen u përballën me autorët, të cilët përfunduan duke ikur. Ndërkohë policia me një operacion shumë të shpejtë arriti të identifikojë dhe arrestojë Endrit Sinaj, së bashku me Alfred Shametaj, Ervin Dhima, Lulzim Elmazaj dhe Enerik Meçaj.
Atyre iu konfiskua një automjet “Mercedes Benz”, me të cilin kishin shkuar për të bastisur shtëpinë dhe një “Nissan” që drejtohej nga njëri prej të dyshuarve në momentin e arrestimit.
Ata konfiskuan gjithashtu telefona celularë dhe prova të tjera, por nuk e gjetën kurrë armën që kishin mbajtur kur kryen sulmin.
Pesë të rinjtë dolën para gjykatës së Vlorës, ku togat e zeza burgosën tre nga të dyshuarit (Alfred Shametajn, Ervin Dhima dhe Enerik Meçajn), ndërsa Endrit Sinaj dhe shoqëruesi i tij Lulëzim Elmazaj fituan lirinë e përkohshme pasi ndaj tyre u vendos masa e sigurisë “detyrim paraqitje”.
