Një denoncim të fortë për angazhimin në fushatë të personave me rekorde kriminale që përkrahin Partinë Socialiste, ka bërë sot deputeti demokrat Edi Paloka.
Ai tha për News24 se e ka të konfirmuar informacionin për kontaktet telefonike të ministrit të Drejtësisë dhe njëherësh drejtuesit politik të qarkut Lezhë, Ulsi Manja e kryebashkiakut Pjerin Ndreu me personazhe të botës së krimit brenda dhe jashtë vendit.
Sipas Palokës, Manja po u kërkon personazheve të botës së krimit që të angazhohen maksimalisht në fushatë duke siguruar vota për PS në qarkun e Lezhës, dhe se në ditët në vijim do të ketë edhe materiale të tjera lidhur me këtë denoncim.
“Dje kam marrë informacion se në qarkun e Lezhës, vetë ministri i drejtësisë kontakton, i japin telefonin nuk merr me telefonin e tij, dhe kontakton me persona me probleme penale në Shqipëri dhe jashtë dhe i kërcënon indirekt ose ju ofron lehtësira nëse ata do angazhohen në fushatë për PS. Kjo është jo vetëm shkelje të kodit, por kemi të bëjmë me krim.
Një ministër u lë të kuptohen se nëse nuk do angazhohen në fushatë, këto probleme do u riaktivizohen. Këtë e bën ministri i drejtësie bashkë me Pjerin Ndreu. Këtë informacion e kam marrë nga njerëz të sigurt, në vazhdim do ketë edhe gjëra të tjera. Nuk dua të them më shumë, a janë të filmuara apo të regjistruara, por do dalin në ditët në vijim”, u shpreh Paloka.
