Gjashtë ekipe me 6 pikë diferencë, 6 javë përpara fundit, për tre vende në Champions League. Ky është konfigurimi i Serie A, ku vetëm Napoli qëndron i qetë, ndërsa të gjithë “bigët” e tjerë nuk kanë asgjë të sigurt.
Nga Lazio i vendit të dytë me 61 pikë deri tek Atalanta e vendit të shtatë me 55 pikë, të gjashtë ekipet kanë ende shanse për të siguruar një biletë për në Champions League sezonin e ardhshëm.
Lazio me 61 pikë shihet më e avantazhuar, nuk janë në Kupë, ndërsa kanë vetëm një sfidë të fortë, atë kundër Milanit.
Me një pikë më pak, Juve renditet në vendin e tretë. Ajo që shqetëson më shumë ekipin torinez janë shifrat, në katër javët e fundit kanë marrë vetëm 1 pikë. Ndeshja kyçe për Juven parashikohet sfida me Milanin në “Stadium”.
Me 57 pikë, Interi renditet në vendin e katërt. Ekipi i Inzaghi-t ka një kalendar shumë të vështirë ku duhet të bëjë llogaritë me ekipe si Roma, Napoli dhe Atalanta, ndërsa janë të impenjuar në Champions dhe në Kupë.
Me 57 pikë, Milan për momentin ndodhet jashtë zonës Champions. Lazio dhe Juve janë dy pengesat e forta, por lajmi i mirë është fakti se 4 nga 6 ndeshjet e fundit i luan në shtëpi. Për ekipin e Piolit gjërat ndërlikohen pak pasi në mes është edhe Champions League.
Me 57 pikë, por aq sa Inter e Milan, Roma renditet në vendin e 6-të. Ndeshja që pritet të vendos jo pak është ajo kundër Interit. Ashtu si Inter edhe Milan, edhe Roma është e angazhuar në Evropë.
Ekipi më pak i favorizuar në këtë garë është Atalanta, me 55 pikë renditen në vendin e shtatë, ndërsa kalendari i rezervon edhe dy përballje direkt, Juventus dhe Inter.
