Erling Haland është konfirmuar një makineri golash edhe në kampionatin anglez ndaj Mançester Siti ka vendosur që të vihet shpejt në lëvizje për të siguruar që sulmuesi norvegjez të mos tundohet nga ndonjë ofertë e çmendur.
Real Madrid monitoron prej kohësh lojtarin dhe PSG dihet që është gati vazhdimisht të bëjë çmenduri me rroga marramendëse për të siguruar yje të futbollit botëror. Ndaj Siti, pa u mbyllur sezoni i tij i parë me “qytetarët”, është gati t’i rinovojë kontratën sulmuesit duke përmirësuar ndjeshëm parametrat financiarë të saj, ndonëse mendohet se ai është që tani futbollisti me përfitimet më të mëdha financiare në këtë klub.
Kontrata e tij skadon në vitin 2027, por Siti është vënë në lëvizje duke menduar sidomos për verën e vitit 2024. Haland ka një klauzolë largimi që mund të aktivizohet në vitin e dytë të kontratës, pra në verën e vitit 2024 dhe cilido klub mund ta blejë për një shifër mes 150-200 milionë eurove.
Nëse ai vazhdon të shënojë me këtë rregullsi si në sezonin e parë në Angli, një shifër e tillë për një futbollist në moshë ende të re, do të ishte një “okazion” për klube si Real Madrid dhe PSG. Ndaj Mançester Siti është ulur në tavolinën e bisedimeve me përfaqësuesit e lojtarit për të rinovuar marrëveshjen dhe për të zhdukur atë klauzolë, në mënyrë që Haland të mos tundohet duke menduar oferta të mundshme por të fokusohet plotësisht vetëm që të vazhdojë sa më gjatë karrierën te klubi aktual.
