Një vrasje brutale është regjistruar në kryeqytetin austriak, Vjenë, mbrëmjen në orët e para të 20 prillit, kur një 31-vjeçar u masakrua në platformën e stacionit të metrosë Jägerstraße (U6).
Mediat austriake kanë raportuar vetëm sot për detajet e tmerrshme, duke bërë me dije se ngjarja ka ndodhur rreth orës 01:00 të mëngjesit, ku rreth dhjetë burra kanë goditur barbarisht të riun.
Burri i identifikuar më vonë nga policia si një algjerian fillimisht ishte në gjendje t’i shpëtonte sulmit dhe më pas u përpoq të ikte përmes shkallëve lëvizëse, por torturuesit e tij e kapën dhe përpara stacionit të metrosë e kanë shtrirë në tokë duke nisur ta godasin në grup.
Dy nga autorët e sulmit kanë nxjerrë hanxharë dhe i kanë prerë duart dhe këmbët viktimës së pambrojtur, ndërsa bashkëpunëtorët e tyre kanë vazhduar ta rrahin viktimën.
Pavarësisht shërbimit urgjent mjekësor, burri nuk kishte asnjë shans t’i mbijetonte gjakderdhjes duke vdekur në spital disa orë pas krimit.
Më shumë se një javë pas vrasjes me hanxhar, policia e Vjenës me sa duket është ende në errësirë, pasi në momentin që shërbimet e urgjencës mbërritën në vendngjarje, autorët ishin zhdukur.
Policia deri më tani ka mundur të arrestojë vetëm një 24-vjeçar, bashkatdhetar i viktimës, i hedhur në kanalin e Danubit për të shpëtuar.
Sipas policisë ai u shpëtua dhe u arrestua si i dyshuar për ngjarjen e rëndë. Sipas raportimeve të vazhdueshme, ai nuk ka rrëfyer asgjë deri më tani dhe ende nuk ka asnjë gjurmë nga agresorët e tjerë.
Arsyet mbeten të paqarta por një gjurmë mund të çojë në mjedisin e drogës. Siç shkruan oe24.at, tregtarët afrikano-verior dhe afganë fshehin mallrat e tyre përgjatë Kanalit të Danubit, pra pikërisht aty ku i dyshuari u hodh në ujë.
