Egnatia luan nesër një ndeshje shumë të fortë, që vendos shumë mbi fatet e sezonit. Rrogozhinasit përballen sërish me Vllazninë, këtë herë në kampionat, ku luftohet shumë ashpër për vendin e tretë, që të çon në Ligën e Konferencës.
Trajneri Tetova ka marrë lajme të mira para ndeshjes, pasi shanset më të mëdha janë që Redi Kasa të jetë rikuperuar tërësisht deri ditën e nesërme. Nga ana tjetër, Arbin Zejnullai është i pezulluar për këtë sfidë.
Në një intervistë për “Panorama Sport”, trajneri i Egnatias foli për sfidën e nesërme, të cilën e konsideron një tjetër histori nga ajo e mesjavës në Kupë ndaj shkodranëve. Sërish në Shkodër, por tani për kampionat, ku ajo që vlen më shumë janë pikët.
Si e keni përgatitur këtë ndeshje? Nuk dua t’i referohem fare Kupës. Vllaznia është kundërshtar shumë i vështirë, por ne do të bëjmë maksimumin për një rezultat pozitiv në Shkodër në ndeshjen e kampionatit këtë fundjavë.
Nga takimi për Kupën besoj se e njihni më së miri ekipin shkodran. Si do t’i kundërpërgjigjeni të dielën në fushë?
Janë dy kompeticione të ndryshme. Kupa edhe të lejon të gabosh në një moment të caktuar, sepse luhet me dy takime. Kur bëhet fjalë për ndeshje kampionati që luhen për pikë, përqendrimi ynë do të jetë 200 për qind. Në do të luajmë me Vllazninë pa asnjë lloj kompleksi. Do të kundërpërgjigjemi me mënyrën tonë. Do të bëjmë maksimumin në fushë dhe shpresoj se loja e djemve tanë të jetë ajo e duhura. Mungon Zejnullai.
Ka ndonjë lojtar tjetër, që nuk është gati?
Kemi vetëm një mungesë për shkak kartonësh, që është Zejnullai. Na vjen keq që ai nuk do të mund të jetë i gatshëm për këtë ndeshje për të ndihmuar ekipin. Por një lajm të mirë mund të na e japin mjekët e skuadrës për sulmuesin Redi Kasa që shpresoj se do të jetë i gatshëm në sfidën e së dielës. Duamena ishte lojtari i ndeshjes të mërkurën. Është ai lideri i sulmit apo Egnatia ka edhe “vrasës” të tjerë? Duke shënuar rregullisht, Duamena po e ndihmon shumë ekipin në sulm. Por edhe Paulauskas nuk është për ne një sulmues në “hije”. Ai punon në mënyrë të palodhur për manovrën tonë sulmuese.
