Mediat greke kanë zbuluar detaje nga arrestimi i 55-vjeçari Kujtim Demiri në lagjen Patisia të Athinës, pasi policia greke zbatoi një urdhër-arresti të lëshuar nga Interpol Tirana për të dënuarin me 15 vite burgim, për veprën penale “Trafikimi i të miturve”, kryer në bashkëpunim.
Teksa autoritetet greke dhe shqiptare janë duke finalizuar procedurat për ekstradimin e Demirit, Protothema zbulon se 55-vjeçari ka kaluar në mënyrë të paligjshme, nga Shqipëria për në Greqi, një shtetas të mitur dhe nëpërmjet dhunës e ka detyruar atë që të lypë, përreth 1 vit.
Fati i fëmijës së trafikuar nuk dihet ende, por detajet sesi Demiri “e bleu” atë në Tiranë janë të paprecedente.
Sipas medias helene, Demiri “e bleu” fëmijën 8-vjeçar nga një familje e varfër në Tiranë. Ai mësohet se ka paguar 100 mijë lekë të reja (rreth 900 euro) për ta marrë të miturin.
Më pas, në mënyrë të paligjshme dhe me dhunë, ai e ka transportuar 8-vjeçarin në Athinë, ku e ka detyruar të lypë në pjesët qendrore të kryeqytetit grek.
Autoritetet greke kanë marrë vetëm disa ditë më parë njoftimin nga Interpol Tirana për Demirin.
Kur Departamenti i Sigurisë së Atikës u njoftua për praninë e 56-vjeçarit në Athinë, mobilizoi menjëherë rrjetin e informatorëve për gjetjen e tij. Kështu, i kërkuari u lokalizua në Patisia, ku policia e ka vënë në pranga dhe ai s’ka bërë asnjë rezistencë.
