Rikandidimi i Kreshnik Hajdarit nga Edi Rama në garën e 14 Majit për bashkinë e Kuçovës u pa me shumë skepticizëm tek elektorati dhe në mjedisin politik, për vetë aferat ku kryebashkiaku u përfshi në këto 4 vite, duke pasur si garantor për tenderat abuziv oligarkun Pëllumb Salillari.
Hajdari i shpëtoi dyerve të hapura të qelisë pasi SPAK u tërhoq nga hetimet për çështjen e Ujësjellësit të Sinecit në njësinë administrative Lumas krejt papritur, me dyshimin se mbi drejtësinë ndikoi dora e zgjatur e “lobistit” Salillari.
Ndërtimi i ujësjellësit mbi kanionin e lumit Sinec ishte i paligjshëm pasi kjo është një Zonë e Mbrojtur dhe e shpallur monument natyre, me vendimin e Këshillit të Ministrave të vitit 2002, ndaj 123 banorë të Lumasit i kallëzuan penalisht kryetarin e Bashkisë Kuçovë, Kreshnik Hajdari që ka miratuar lejen dhe oligarkun në fjalë.
Oligarku, të cilit emri i del në çdo tender të majmë të qeverisë Rama ishte përfituesi direkt i procedurës së prokurimit me vlerë 3.6 milionë euro që bashkia Kuçovë kishte hapur për ujësjellësin dhe shkatërrimin e zonës së mbrojtur “Kanioni Sinec” në Lumas, kur pritej që më pas të ndërtohej edhe një fabrikë uji në bashkëpunim me ish-drejtuesin e qarkut për PS, Blendi Klosi.
Bashkëpunimi i frytshëm me Salillarin, duket se e zbuti edhe qëndrimin e drejtuesit të ri politik të qarkut të Beratit, Blendi Cuçi, për të cilin Kreshnik Hajdari ishte “halë në sy” dhe tanimë kryebashkiaku aktual i Kuçovës synon një mandat të dytë në krye të qytetit.
Por, përballë tij ai gjen ish-deputetin demokrat Lefter Maliqi, i cili ka vijuar të denoncojë që prej nisjes së fushatës elektorale se influencën e Pëllumb Salillarit në vendimet e tenderat e bashkisë Kuçovë, duke nënvizuar se Kreshnik Hajdari është peng i oligarkut.
Teksa na ndajnë vetëm 17 ditë nga zgjedhjet lokale të 14 majit, Maliqi me anë të një postimi në Facebook, të cilin e shoqëron me një video nga një takim elektoral me prezencë të lartë qytetarësh që mbështesin koalicionin “Bashkë Fitojmë”, ironizon dyshen Hajdari-Salillari.
“Pengun Kreshnik Salillari nuk e shpëton dot oligarku Pëllumb Hajdari”, shkruan Maliqi, ndërsa nënvizon se qytetarëve po u bëhet presion dhe po shantazhohen hapur për të votuar kandidatin socialist.
Në shkelje të hapur të Kodit Zgjedhor sipas Maliqit, po hidhet në rrugët e qytetit asfalt elektoral, i cili financohet gjithashtu edhe “nga pengmarrësi i takasave”, Salillari.
“Kuçova nën presion psikologjik, shantazhe, joshje nga segmente të shtetit, me prova të vena në dispozicion të organizmave ndërkombëtar. Çakull elektoral kudo, para të hedhura për votë, ndihma familjeve në nevojë dhe premtime marramendëse. Administrata në orar zyrtar në fushatë në shkelje të plotë të Kodit Zgjedhor.
Mamuthët e korruptuar janë tërbuar nga ndëshkimi popullor. Lekët i merrni janë lekët tuajat dhe votoni kundër pengut dhe pengmarrësit të taksave tuaja. Kuçova do shpëtoj nga krimi, korrupsioni, imoraliteti, paaftësia dhe ky terror psikologjik i paparë ndonjëherë në historinë e qytetit të guximtarëve, intelektualëve naftëtarëve dhe aviatorëve. Kuçova “Kantier Ndërtimi”!”, shkruan Maliqi më tej.
