Një gazetar ukrainas që punon për gazetën italiane ‘La Repubblica’ është qëlluar për vdekje nga snajperët rusë në jug të Ukrainës, ndërsa kolegu i tij italian është plagosur. Lajmin e ka bërë publik vetë gazeta. Viktima është identifikuar si Bogdan Bitik, babai i një fëmije. Ndërsa Corrado Zunino u plagos në shpatull dhe po merr mjekime në spitalin në Kherson.
“Sot, korrespondenti ynë Corrado Zunino dhe fiksuesi i tij Bogdan Bitik ishin viktima të një prite pranë urës në Kherson nga snajperët rusë në periferi të Khersonit, në Ukrainën jugore. Bitik për fat të keq nuk ia doli dhe vdiq: ai la pas gruan dhe një djalë. Corrado, i cili u plagos në shpatull, ndodhet në spitalin civil në Kherson,” tha La Repubblica.
Zunino, i cili kishte mbuluar gjerësisht konfliktin, tha për La Repubblica se kishte veshur një jelek antiplumb, kur u sulmuan.
“Jam mirë, kam një plagë në shpatullën e djathtë, e rruar nga plumbi që goditi mikun tim të madh Bogdanin. E pashë Bogdanin në tokë, ai nuk lëvizte. U zvarrita derisa dola nga vija e zjarrit. Vrapova derisa hasa në makinën e një civili. Isha i mbuluar me gjak, u dërgova në spitalin në Kherson. Kam tentuar disa herë ta telefonoj Bogdanin, nuk më është përgjigjur. Ai ishte një mik i madh i imi, dhimbja është torturuese. Është e vështirë të rikuperosh trupin e Bitik për momentin, për shkak të pranisë së snajperëve”, shtoi ai.
Ministri i Jashtëm italian, Antonio Tajani, tha se ministria e tij dhe ambasada italiane në Kiev po punonin me autoritetet ukrainase për kthimin e Zunino në Itali, shkruan The Guardian.
Të paktën 12 gazetarë dhe punonjës të medias janë vrarë në Ukrainë që nga fillimi i pushtimit dhe 18 janë plagosur, sipas Federatës Ndërkombëtare të Gazetarëve. Shumica e tyre ishin ukrainas.
Në maj të vitit 2022, gazetari francez Frédéric Leclerc-Imhoff, 32 vjeç, u vra pasi një automjet i blinduar evakuimi në të cilin po udhëtonte u godit nga predha ruse në qytetin Sievierodonetsk në Ukrainën lindore.
