Gjashtë persona janë shpallur në kërkim lidhur me ekzekutimin e biznesmenit 51-vjeçar Ardian Nikulaj në Shëngjin. Vrasja, sipas hetimeve, ka lidhje me një histori gjakmarrje mes dy fiseve Lekstakaj dhe Nikulaj, që ka shënuar disa viktima.
Nikulaj u ekzekutua me armë zjarri në ambientet e lokalit të tij “Coral” rreth orës 13:25, të 19 Prillit. Këtë të Mërkurë, policia konfirmoi caktimin e masës së sigurisë arrest me burg në mungesë nga Gjykata e Lezhës për gjashtë persona, të dyshuar si të përfshirë në vrasjen e Nikulajt.
Skuadër e huaj për ekzekutimin
Edmond Haxhia, me nënshtetësi britanike, katër shtetas britanikë – mes tyre dhe një femër (me iniciale Harry Simson, Harriet Bridgeman, Steven Hunt, Thomas Mithan) dhe një protugez (Ruben Saraiva) në rolin e ekzekutorit, sipas hetimeve, janë personat e përfshirë në krim.
Ndaj tyre janë ngritur akuza për veprën penale “Vrasja me paramendim”, kryer në formën e grupit të strukturuar kriminal, “Kryerja e veprave penale nga organizata kriminale dhe grupi i strukturuar kriminal” dhe “Mbajtja pa leje dhe prodhimi i armëve, armëve shpërthyese dhe municionit luftarak”.
Edmond Haxhia, i afërm me familjen Lekstakaj, dyshohet se porositi dhe financoi vrasjen. Ai ishte kthyer prej disa muajsh në Shqipëri, ndërsa është larguar sërish pas vrasjes, ashtu si personat e tjerë të akuzuar.
Në një deklaratë për mediat, drejtuesi i Policisë Muhamet Rrumbullaku tha se “grupi hetimor po bashkëpunon me partnerët dhe strukturat ligjzbatuese ndërkombëtare, për kapjen e autorëve të kësaj ngjarjeje të rëndë kriminale, të cilët janë larguar nga territori i Republikës së Shqipërisë, pas kryerjes së krimit”.
Ai bëri me dije po ashtu se në vendngjarje u sekuestruan gëzhoja arme zjarri model 54, kalibër 7.62 mm; një predhë model 54, kalibër 7.62 mm; një letërnjoftim; celular i markës “iPhone”, dhe disa prova të tjera biologjike dhe filmike.
“Si rezultat i hetimeve janë dokumentuar veprimet e autorëve të dyshuar, nga momenti i organizimit, deri në momentin e vrasjes së 51-vjeçarit Ardian Nikulaj si dhe e gjithë dinamika dhe itineraret e përshkruara nga ekzekutori dhe të gjithë shtetasit e tjerë të përfshirë si organizatorë dhe bashkëpunëtorë në kryerjen e kësaj ngjarjeje. Nga veprimet procedurale të kryera për këtë ngjarje janë siguruar prova shkencore biologjike të pakundërshtueshme që i përkasin autorëve të kësaj ngjarjeje të rëndë kriminale. Përsa i përket automjeteve të përdorura për kryerjen e krimit nga autorët e dyshuar është dokumentuar përdorimi i tyre nga personat e dyshuar për një periudhë kohore për realizimin e vrasjes”, deklaroi drejtuesi i Policisë.
FOTO e një prej shtetasve anglezë të shpallur në kërkim Steven Hunt, i akomoduar në hotelin e Nikulajt. Ai dyshohet se kishte rolin e mbikëqyrësit të lëvizjes së biznesmenit dhe i jepte informacione “killerit” portugez.
