Kallëzimi për dhunë fizike nga e bija e tij 24-vjeçare është mbyllur me një dënim me 3 vite burg për një 53-vjeçar shqiptar në Greqi.
Konflikti në familjen shqiptare ndodhi pasi babai i vajzës refuzoi të pranonte vendimin e saj për të vendosur të mbante shaminë e fesë myslimane.
“Në sytë e tij shihja se po e shijonte. I bërtita të më linte, por ai vazhdonte të më godiste”, dëshmoi 24-vjeçarja, e cila kishte lëndime të dukshme në fytyrë gjatë dëshmisë së saj në Gjykatë.
Ajo shtoi se dhuna në familje ishte e zakonshme, pasi edhe nëna dhe vëllai i saj 13-vjeçar janë dhunuar.
24-vjeçarja vetë jeton në Londër, pasi studion në fushën e Biokimisë dhe se këto ditë ishte kthyer në Greqi për të vizituar familjen e saj.
“Ose nxirre vajzën ose do ta nxjerr unë me dhunë”, i thoshte i ati nënës së vajzës sipas rrëfimit të 24-vjeçares, teksa ka shtuar se i ati i thoshte “ke humbur mendjen dhe ke marrë rrugën e djallit”.
Pasditen e së dielës, 24-vjeçarja doli në tarracë e veshur me shami, ku 53-vjeçari pasi e ka kërcënuar, e ka sulmuar me grushte dhe e ka rrahur.
Më pas ajo e ka kallëzuar në polici. “Më ka goditur edhe kur isha e vogël, ka goditur shumë herë nënën dhe vëllain tim. Nuk është diçka që ai e bën kur është duke pirë, ai sulmon kur është esëll. Ai ka refuzuar të marrë ndihmë psikologjike”, ka rrëfyer më tej 24-vjeçarja.
53-vjeçari u shfaq i penduar dhe kërkoi falje, teksa tha: “Isha me nerva, për dy minuta. Sapo kisha ardhur nga puna dhe isha i lodhur. Ndonjëherë gjërat nuk shkojnë mirë financiarisht. Kur erdhi vajza ime nga Anglia i thashë të besojë ku të dojë, por ajo duhet të heqë shaminë që të mos na bëjë të dukemi keq. Por ajo bënte gjithmonë atë që donte”.
Në lidhje me akuzat për dhunë ndaj bashkëshortes dhe djalit të mitur, ai u shpreh para togave të zeza se janë ‘ekzagjerime’.
