Një ngjarje e rëndë që përfshin një shtetas shqiptar ka ndodhur në Spanjë, të dielën që lamë pas. Mediat iberike raportojnë se shqiptari u gjet i pajetë në dyert e një spitali në qytetin e Gironas, ku u braktis nga disa persona me makinë me një plagë në bark.
Targat e mjetit që e lanë te dera e spitalit, bënë që Mossos d’Esquadra të përqëndronte hetimet dhe agjentët kanë arritur të identifikojnë viktimën, i cili nuk kishte asnjë dokument me vete.
Hetuesit kanë monitoruar edhe kamerat e sigurisë duke arritur që të gjejnë edhe personin që e drejtonte mjetin në momentin kur lanë shqiptarin e plagosur rëndë në dyert e spitalit.
Sipas burimeve, vizualizimi dha rezultat dhe ata zbuluan se shoferi i makinës është gjithashtu shtetas me origjinë shqiptare, me banim midis rajonit Maresme dhe La Selva.
Mëngjesin e së hënës, atij iu mor një deklaratë në stacionin e policisë Vista Alegre në Girona. Falë kësaj deklarate, agjentët kanë zbuluar se viktima, ashtu si drejtuesi i mjetit janë të dy rreth 30 vjeç.
Ata morën një deklaratë edhe nga punonjësit e shëndetësisë që e trajtuan atë dhe po përpiqen të rindërtojnë ngjarjen dhe për të zbuluar më shumë detaje lidhur me momentet e fundit para goditjes me thikë, për të zbuluar autorin e ngjarjes.
Mësohet se sulmi ndaj shqiptarit ka ndodhur para orës 07:00 të së dielës, kohë kur një automjet ka ndaluar në derën e emergjencës së spitalit për të lënë trupin e tij në duart e një infermiereje dhe një mjeku.
Ata ndihmuan për t’a nxjerrë nga makina shqiptarin, i cili kishte një plagë me thikë në bark dhe ishte në arrest kardiorespirator, ndërsa makina u largua me shpejtësi nga vendi.
Mjekët u përpoqën ta mbanin në jetë për 45 minuta duke kryer CPR, por pa sukses. Sipas burimeve nga Trueta, kur ka mbërritur në qendër “ai kishte vdekur tashmë”.
Trupi i viktimës është transferuar në Institutin e Mjekësisë Ligjore në Girona (IMLC) në mënyrë që të kryhet autopsia të sqarohet shkaku i saktë i vdekjes.
