Një punonjës i Bashkisë në Patos është dhunuar fizikisht mesditën e sotme. Sipas të dhunuarit, shkak për këtë janë bërë disa vota për zgjedhjet e 14 Majit.
Bato Dalipaj ka treguar se është dhunuar nga përgjegjësi i ndërmarrjes Petrit Pëllumbi, pasi ky i fundit i ka kërkuar në nënshkruajë një formular me vota të sigurta për kryetaren socialiste të bashkisë, e cila garon sërish për lokalet e 14 Majit.
Në një deklaratë për mediat, punonjësi Dalipaj deklaron se është mbështetës i kandadates së opozitës Sofije Alushaj dhe se përgjegjësi i bashkisë Petrit Pëllumbi i ka kërkuar të shkruajë në fletë 10 votues të sigurtë.
Ai shton se në momentin që nuk ka pranuar të nënshkruajë formularin, atëherë Petrit Pëllumbi e ka goditur disa herë me grushte, duke i shkaktuar dëmtime të rënda në kokë dhe në fytyrë.
“Punoj 4 orarësh në komunale prej 10 muajsh. Petrit Pëllumbi në zyrë përgjegjës më kërkoi të shkruaja pjestarët e familjes në një formular. Unë nuk e firmosa pasi nuk jam 8 orarësh në punë. Ti s’më ke futur 8 orarsh, s’të fus më tha. Erdhi nga pas më kapi nga supi dhe më goditi me 3 a 4 grushta dhe i gjakosur rash përtokë. Më çuan në spital drejtori i ndërmarjës Artjoli s’bëra denoncim i thashë rash, gabimi im. Shkova në shtëpi tani u enjta dhe vendosa të bëj denoncim në polici”, tha Bato Dalipaj.
Ky i fundit ka bërë kallëzim dhe në polici, që pas publikimit të rastit në media njoftoi nisjen e një hetimi.
“Rreth orës 16:10, shtetasi B. D., 55 vjeç (punonjës i ndërmarrjes së komunales, bashkia Patos), është paraqitur në Komisariatin e Policisë Fier, për të bërë kallëzim, duke pretenduar se në ambientet e punës, eprori i tij, shtetasi P. P. ka ushtruar dhunë fizike ndaj tij, për shkak nuk ka pranuar të plotësojë një formular. Specialistët për Hetimin e Krimeve të Komisariatit të Policisë Fier kanë njoftuar menjëherë Prokurorinë pranë Gjykatës së Rrethit Gjyqësor Fier, dhe në prani të oficerëve të Policisë Gjyqësore, shtetasit B. D. po i merret dëshmia në lidhje me rrethanat e ngjarjes, si dhe po kryhen të gjitha veprimet procedurale. Ndërkohë, vijojnë veprimet hetimore për sqarimin e plotë të rrethanave të këtij rasti. Në përfundim të veprimeve procedurale, materialet hetimore do t’i referohen Prokurorisë pranë Gjykatës së Rrethit Gjyqësor Fier”, thuhet në një njoftim të policisë lokale.
Lidhur me rastin reagoi dhe deputeti demokrat i Fierit Luan Baçi.
“Kryeministri duhet të heqë dorë nga presionet dhe shantazhi, duhet s’del vete kryeministri po dalin të vegjlit e kryeministrit. Jemi në mes të fushatës dhe situata do agravojnë. Edi Rama e di që do të humbë se nuk ia voton njeri kandidatët problematikë dhe do që t’i marrë bashkitë me dhunë. I bëj thirrje OSBE/ ODIHR që të jetë në terren për të vëzhguar situatën”, tha Baçi në një reagim për mediat.
Ditën e sotme, kryeministri Edi Rama zhvilloi një takim elektoral me mbështetësit në Patos ku prezantoi dhe kryebashkiaken socialiste.
