Kryetari i PD-së, Sali Berisha u shpreh këtë të Martë se anëtarit të KAS Ilir Rusmaili i është premtuar nga kryeministri Edi Rama posti i Avokatit të Popullit.
Në një emision televiziv, Berisha u pyet lidhur me raportin e tij në të kaluarën me Rusmailin – i cili ishte relator në shqyrtimin e kërkesës së koalicionit “Bashkë Fitojmë” për vendosjen e emrit të Berishës në fletën e votimit për zgjedhjet lokale. Kërkesë e cila u rrëzua.
Berisha tha se ish-ministri i Drejtësisë së kabinetit të tij qeveritar “është larguar për korrupsion dhe i kam kërkuar dorëheqjen”.
“Shkeli në mënyrë flagrante korruptive ligjin. Drejtori i Përgjithshëm i burgjeve hap një tender dhe në tender shkon vëllai i Ilir Rusmailit dhe drejtori e regjistron kur i vëllai e kërcënonte me vëllanë. Iliri shkarkoi drejtorin Saimir Sheri. Ndodhi që unë ditën që doli skandali duhet të nisesha në drekë jashtë. I dhashë me kuptue që problemi kur të kthehem do shqyrtohet. Ai e shkarkoi kur ishte kompetencë e kryeministrit dhe kur u ktheva mori një shkarkim”, tha Berisha.
Më tej, shtoi se vendimi për refuzimin e kërkesës së koalicionit opozitar “Bashkë Fitojmë” është vepër e Ramës. Për Rusmailin, tha se “është i mjeruar se i ka premtuar (Rama) të marrë këto vendime dhe ta çojë në krye të Avokatit të Popullit”.
