Gjykata e Apelit të Juridiksionit të Përgjithshëm ka vendosur lënien në fuqi të vendimit për Astrit Sinanajn, dënimin me 25 vite burg.
Gjykata e Elbasanit ka dënuar me 25 vite burg në vitin 2020 Astrit Sinanaj, i cili i tentoi të vrasë biznesmenin Fuad Verzivollin më 6 maj 2017 në Elbasan duke i vendosur poshtë makinës 1 kg tritol C4, që fatmirësisht nuk shpërtheu.
Astrit Sinanaj, njihet dhe si miku i Julian Sinanaj, vrasësit me pagesë të bandës së tritolit në Vlorë, tashmë i dënuar me 30 vite burgim nga Gjykata e Krimeve të Rënda.
Sinanaj është deklaruar fajtor dhe dënuar me 25 vite burg i akuzuar për 4 vepra penale të “Vrasje me dashje e kryer në mënyrë të rrezikshme për jetën e shumë personave”, “Mbajtjes pa lejë të armëve shpërthyese”, “Shkatërrimit të pronës me eksploziv” dhe “Largimit i të burgosurit nga vendi i qëndrimit”.
Për Sinanaj, prokuroria kishte kërkuar dënimin me 30 vite burgim. Ndërsa personi tjetër i pandehur në këtë çështje për akuzën e “Moskallëzimit të krimit”, Thanas Thoma, një ish-punonjës kazinoje në Elbasan, është dënuar me 10 muaj burgim. Për Thomën, prokuroria kishte kërkuar në pretencën e saj, dënimin me 1.6 vite burgim.
