“Shanse për të fituar Champions League? Gjithmonë duhet bërë një rrugëtim, por sigurisht që mund ta fitojmë atë”, deklaronte më 22 shkurt Simone Inzagi atëherë kur përgatiste ndeshjen e parë të fazës së 1/8-ave me Porton.
Interi i tij është në garë për të mbërritur në finale, i vetëdijshëm se ka bërë një rrugë të gjatë dhe të bukur deri më tani, e cila ka qenë tërësisht e ndryshme nga ajo e kampionatit.
Interi ama diti të gjente forcën ndaj Benfikës e sidomos në sfidën e dytë, kur Inzagi luante të ardhmen e tij dhe siç zbulon “La Gazzetta dello Sport” e përgatiti grupin si psikologjikisht dhe taktikisht.
Fjalët e folura në prag dhe gjatë takimit teknik të së mërkurës shkundën mirë lojtarët që vinin nga paraqitje zhgënjyese të tyre në kampionat dhe nga një sërë kritikash.
Mundësia për t’u kualifikuar në gjysmëfinale të Ligës së Kampionëve duhej jetuar me tensionin e duhur dhe vëmendjen e duhur. Duhet të shfaqemi të bashkuar dhe të përqendruar pa u ndikuar nga pozicionimi në kampionat. Duhet të jemi grup i vërtetë, të bëjmë një ndeshje prej Interi dhe të sakrifikojmë për njëri-tjetrin nga fillimi deri në fund. Asnjë nuk duhet të mendojë për 0-2 e ndeshjes së parë dhe të spekulojë për avantazh. Kemi mundësinë të bëjmë histori dhe mund ta bëjmë vetëm nëse jemi të fokusuar nga fillimi në fund”, kanë qenë fjalët e Inzagit ndaj grupit sipas të përditshmes italiane.
Një tjetër pikë në të cilën është fokusuar trajneri kanë qenë edhe analizat me video të kundërshtarëve, por mbi të gjitha edhe ndarjet e seancave stërvitore.
Stërvitjet e zhvilluara të hënën, të martën dhe të mërkurën në mëngjes, Inzagi i ndau duke ia dedikuar njërën fazës mbrojtëse, njërën fazës sulmuese dhe njërën punës me topat inaktivë.
Qëllimi ishte që kundërshtarëve t’u largohej topi dhe të mos u lejoheshin driblimet, arsyeja për të cilën edhe sulmuesve iu kërkua të sakrifikonin dhe të tërhiqeshin. Strategjitë duket se në fund e shpërblyen Inzagin që në sot duhet të gjejë një tjetër strategji për kuqezinjtë e Piolit.
