Zhdukja pa gjurmë e dy 46-vjeçarëve në Sarandë prej datës 6 prill, kur dyshohet se hipën me konsensus në një automjet tip “Mercedes Benz” për të mos u parë më në publik më pas, ka alarmuar familjarët.
Pas apelit të vazhdueshëm në media dhe thirrjeve drejtuar autoriteteve ligjzbatuese, familjarët e Leonard Thodhorit të njohur si “Koçolja” dhe Fatmir Sulovarit (alias Fatmir Krasniqi) i janë drejtuar Komisariatit të Sarandës, ku kanë protestuar pasditen e sotme, duke kërkuar që të gjendet të afërmit e tyre.
I vëllai i Fatmir Sulovarit kërkoj t’i gjendet trupi i të vëllait, edhe në qoftë se e kanë vrarë, e për më tepër u përplas verbalisht dhe me një efektiv policie që ishte në krye të detyrës duke i kërkuar që të takohet me shefin e komisariatit.
“Kush është në shërbim vëlla. Po sikur të të marrim peng ne ty ore, të të fusim në makinë, do vijë shteti?”– i thotë vëllai i 46-vjeçarit të zhdukur.
Efektivi ndërkohe i përgjigjet duke thënë se shefi nuk gjendet aty për momentin. “Është në shtëpi”, dëgjohet të thotë ai.
“Ore ti ke familje ti, ke njerëz more zotëri, se s’po të bëjë presion. Ne nuk po vijmë as për një lopë, as për një viç, por po vijmë për dy njerëz të humbur. A ke epror ti? Ti s’më sqaron dot mua, unë dua një shefin e komisariatit. Mua s’më intereson. Unë dua trupin, ta marr dhe t’ua çoj atyre prindërve në shtëpi. Kam 15 ditë që po e kërkoj. Merre të vijë këtu. Janë familjarët e atyre të zhdukurve, ka 15 ditë. Ke vëlla ti, ke djalë ti, po të humbi vëllai yt? Ore ka ardhur Gëzimi thuaj more”, – vijon të thotë më pas vëllai i Sulovarit.
Sakaq efektivi duke parë situatën e tensionuar i thotë: “Mos më kërcëno”!
“Po s’po të kërcënoj more, merre thuaj, ka ardhur Gëzimi”, – ia kthen në fund vëllai i personit të zhdukur.
Ndërkohë familjarët thanë për mediat se para komisariatit do të mblidhen vazhdimisht, derisa të kenë një përgjigje nga Policia e Sarandës.
Sa i përket të zhdukurve, nga hetuesit ka dyshime se kenë hipur me vullnetin e tyre në një makinë me targa greke të vjedhur në Lezhë, duke nënkuptuar se njiheshin me drejtuesin. Mjeti në fjalë është pikasur nga kamerat në hyrje të Sarandës, por nuk është parë të dalë më nga qyteti.
Dyshimet janë se automjeti i rrëmbyesve mund të ketë përshkruar Qafën e Soronesë për të hyrë ne territorin e Bashkisë Konispol, por ende nuk ka një version zyrtar.
Kush janë dy personat e zhdukur?
- Leonard Theodhori, 46 vjeç i njohur si “Koçole”. I dënuar disa here. I dyshuar si pjesëmarrës në Masakrën e Qafë-Gjashtës në vitin 1997 ku u vra oficeri i policisë Gjergj Mehmeti. Në vitin 2003 ka qenë prezent ne automjetin që drejtohej nga Andrea Gjini para se ky i fundit të vriste biznesmenin Jaho Bajo. I arrestuar po atë vit për “moskallëzim krimi” lidhur me një ngjarje tjetër të kryer nga Gjini. I arrestuar më pas per “vjedhje” e “mashtrim”. Përdorues i lëndëve narkotike dhe i dyshuar si i perfshirë në trafik lëndësh narkotike.
- Fatmir Sulovari alias Fatmir Krasniqi, 46 vjeç. I dënuar më parë për “armëmbajtje pa leje” dhe “plagosja e lehtë me dashje”. I arrestuar ne prill 2022 ne Lushnje, pasi ne mjetin e tij “BMË” X5 u gjet një sasi kanabisi e ndarë në doza gati për shitje.
