Një sherr i dhunshëm mes dy grupe të rinjsh raportohet të ketë ndodhur mbrëmjen e sotme në Elbasan.
Nga informacionet paraprake rezulton se të rinjtë janë konfliktuar me sende të forta në sherrin që ka ndodhur në bulevardin e qytetit.
Bëhet me dije se 26-vjeçari Kei Piu, i njohur si problematik në qytet ka mbetur i plagosur në vendngjarje dhe gjatë sherrit janë përdorur armë të ftohta si gota e thikë.
Protagonist ka qenë pikërisht i riu, i cili ka mbetur i plagosur. Ai është përleshur me një grup të rinjsh teksa ndodhej në një lokal në qendër të qytetit.
Piu është dërguar në spital ku po merr mjekimin e nevojshëm, ndërkohë që nuk ka ende detaje nga Policia e Elbasanit për ngjarjen në fjalë edhe pse forcat e rendit ndodhen në vendngjarje dhe po punojnë për zbardhjen e plotë të rrethanave.
Sa i përket Kei Piut, ai është një emër i njohur për policinë pasi në vitin 2020 i ka shpëtuar një atentati me armë zjarri. Në drejtim të të riut, asokohe 23 vjeç, u qëllua me breshëri plumbash nga një fuoristradë në lëvizje, teksa ai udhëtonte me mjetin e tij tip “Range Rover”.
Persona të maskuar i bënë pritë pas mesnate në lagjen “Luigj Gurakuqi” dhe qëlluan me tre plumba në drejtim të të riut. Dy plumba përshkua trupin e tij, një në bark por pa i prekur asnjë organ jetik dhe tjetri e preku përciptazi në krah.
Atentatori nuk ka mundur të qëllojë sërish nga brenda makinës ku ndodhej, pasi iu bllokua arma. Në këto kushte, të frikësuar se mos pikaseshin nga policia, autorët ia mbathën duke përfituar edhe nga errësira.
Në polici ai deklaroi se nuk e njihte autorin, por me zbardhjen e kamerave të sigurisë u zbulua se ai kishte debatuar me autorin pak orë para se t’i bëhej atentati.
Kei Piu gjithashtu ka qenë shoqëruar disa herë në polici edhe për lëndë narkotike, ndërsa njihet edhe si pronari i një palestre në Elbasan.
