Fushata elektorale për zgjedhjet e 14 majit ka hyrë në javët finale të saj dhe kandidatët e opozitës janë duke u angazhuar maksimalisht për të nxjerrë në pah problematikat e qytetarëve, që duhet të marrin zgjidhje pasi të largohen kryebashkiakët e zgjedhjeve monopartiake të 2019-s.
Një nga bashkitë ku beteja do të jetë e ashpër për shkak edhe vendosjes strategjike në zonën më të industrializuar të vendit, është Vora, aty ku kandidati i koalicionit “Bashkë Fitojmë”, Indrit Hoxha ka nxjerrë në pah abuzimet disa qindra milionë euro që janë bërë me tenderat nga ana e socialistëve.
Duke folur për pritshmëritë nga procesi i 14 majit në emisionin “Kjo Javë”, Hoxha tha se Vora është një bashki e falimentuar qëllimisht nga kryeministri Edi Rama, në mënyrë që të përdorë buxhetin e saj për tendera e PPP.
Ai ka zbuluar disa nga aferat e tenderave ku janë përfshirë socialistët, duke theksuar se kryetari aktual vetëm në 12 muaj ka firmosur për 14.2 milionë euro procedura tenderimi.
“Vora është një vatër e nxehtë. Sa i përket kandidatit që kam përballë, nuk i di as emrin. Vora është simbol i krimit të Ramës, ka ndryshuar 5 kryetarë bashkish në 4 vite ose për dekriminalizim ose për afera. Kryetari aktual ka bërë në 12 muajt e fundit ka bërë 14.2 mln procedura tenderimi. Po të dalësh në terren, zbatimi i tyre është zero. Bashkia e Vorës është e falimentuar me qëllim nga Edi Rama në mënyrë që të përdorë fondet për të tendera e PPP për ta kthyer bashkinë në KÇK”, tha Hoxha.
Më tej ai bëri me dije se do t’i drejtohet të hënën SPAK-ut për t’i dorëzuar provat dhe dokumentet që faktojnë abuzimin me paratë e taksapaguesve, duke theksur se ka marrë përsipër të çoj para drejtësisë këdo që ka vënë duart mbi taksat e qytetarëve sidomos në Vorë, qoftë i majtë apo i djathtë.
“Abuzim me taksat e qytetarëve. Të hënën do t’i drejtohem SPAK për të çuar abuzimet me tenderimet e bëra. Dokumentacioni është gati. Tenderi i pastrimit të bërë në Vorë ka kushtuar 2.3 mln euro taksa, sot Vora është qyteti më i pisët. Një tender tjetër për një pastrim emergjencë 90 ditore, është diku tek 350 mijë euro. Tjetra është për zyrat e bashkisë, sepse bashkia nuk ka zyra por vetëm ambiente të marra me qera, ka kushtuar 6 mln euro. Këto janë disa nga dosjet. I bëj thirrje SPAK të mos veprojë para datës 14 që të japë llogari para qytetarëve dhe pastaj para drejtësisë”, theksoi kandidati opozitar.
Ai gjithashtu u shpreh se ka besim që SPAK do e çojë kryetarin e bashkisë para drejtësisë, ndërsa theksoi se ka një plan për nxjerrjen e bashkisë nga falimenti, ku përfshihet ulja e taksave.
“Plani im është nxjerrja e bashkisë nga falimenti. Do miratoj uljen e taksave 50% për biznesin e madh dhe 80 % për atë të vogël. Do falen edhe taksat e 4 viteve të fundit të biznesit të vogël, por jo për biznesin e madh”, deklaroi Hoxha.
