Autoriteti Rrugor Shqiptar bën të ditur se, duke nisur nga e diela e 23 prillit do të rinisin punimet e makinerive të rënda në “Unazën e Madhe” të kryeqytetit, në segmentin nga mbikalimi i Pallatit me Shigjeta deri në zonën e Astirit.
Ky devijim do të jetë në fuqi për një periudhë dymujore dhe ARRSH ka publikuar mënyrën sesi do të kryhet lëvizja e mjeteve gjatë kësaj kohe.
Sipas autoritetit janë marrë të gjitha masat për kufizimin e kantierit ku do të kryhen punimet, si dhe vendosjen e sinjalistikës provizore për të orientuar përdoruesit e rrugës, e ndërkohë kërkohet mirëkuptimi i qytetarëve për këto ndërhyrje që po kryhen në këtë aks.
LËVIZJA DEVIJON SI MË POSHTË:
-Automjetet që vijnë nga Mbikalimi i Pallatit me Shigjeta, aksi kryesor, në drejtim të Astirit do të devijojnë majtas sipas sinjalistikës horizontale dhe vertikale.
-Automjetet që kanë destinacion Qendrën, Laprakën, Astirin do të marrin daljen e autostradës pa u futur në nënkalimin e Astirit.
-Automjetet që kanë destinacion Durrësin dhe Aeroportin do të vazhdojnë drejt përgjatë unazës Loti 3 duke vazhduar lëvizjen drejt.
-Automjetet që vijnë nga kryqëzimi i Astirit (rruga dytësore) në drejtim të Pallatit me Shigjeta dhe që kanë destinacion Elbasanin, do të marrin daljen për në rrugën kryesore duke vazhduar sipas sinjalistikës.
-Automjetet që vijnë nga aksi kryesor nuk do të kenë ndryshim lëvizjeje.
