Interi arriti të kualifikohej në gjysmëfinalet e Champions-it për herë të parë që nga 2010, vit në të cilin e fituan. Për këtë arritje, trajneri i zikaltërve, Simone Inzagi, nuk e fshehu gëzimin, duke i dhënë kredite skuadrës së tij.
“Jam i lumtur për rrugëtimin që po bëjnë djemtë pasi e di se çfarë duhet bërë në Champions. E nisëm nga një grup i vështirë me Bajenin e Barcelonën, por jemi shumë të mirë kur jemi të bashkuar.
Kritikat? Nuk janë problem. E di se nga vijnë. Disa flasin mirë, disa flasin keq. Jam me fat që kam qenë pjesë e kësaj bote për kaq shumë vite, di çdo gjë, por jam i fokusuar që t’i sjell njerëzve mbrëmje si këto.
Nuk kam të preferuar mes Xhekos dhe Lukakut. Qëllimi im është t’i kem të disponueshëm të gjithë. Kemi një kalendar të ngjeshur dhe na duhen të gjithë.
Te goli i tretë djemtë më thanë se dëgjuan një vërshëllimë dhe u ndalën. Do të kisha dashur të fitoja, edhe pse ishte arritur gjysmëfinalja. Bilbilin e dëgjuam edhe nga pankina dhe u ndalëm”, u shpreh Inzagi.
