Fatjon Softa, eksperti i sigurisë është shprehur për vrasjen e biznesmenit Ardian Nikulajt ditën e sotme. Softa për gazetaren Rovena Neziri, tregon që për ngjarjen në fjalë ka një sërë pistash, të cilat kryesisht për të duhet të fokusohen te aktiviteti i biznesmenit brenda dhe jashtë vendit, më shumë se në pistën politike, po pa e përjashtuar dhe atë. Eksperti shprehet se rendi jo vetëm që është cenuar rëndë po është në pikat më të dobëta të tij. Kjo situatë, gjithashtu shkakton pasiguri dhe frikë dhe te kandidatët e tjerë që janë duke garuar në zgjedhjet e 14 Majit, duke qenë se në vitin 2021 viktima kandidoi për kryebashkiak dhe në këto zgjedhje po kandidonte për këshilltar. Sa për atentatin dhe autorin, Softa argumenton që nuk ka qenë profesional. Pavarësisht gjakftohtësisë që mund të ketë patur gjatë aktit, eksperti i sigurisë thotë se, mënyra si ka zgjedhur ta bëjë këtë të lë të mendosh që nuk ka qenë ajo që do të bënte një profesionist. Sa për ngjarjet e tjera kriminale, që kanë prekur opinionin publik, Softa thotë se një pjesë e mirë materialeve të gjetura ka qenë prej kamerave të sigurisë, sakaq shton se jemi shumë mbrapa në parandalimin e ngjarjeve të tjera, duke qenë se ende nuk ka filluar puna për mbledhjen e municioneve që ekzistojnë paligjshmëriosht në duart e shumë shtetasve.
Gazetarja: Mund ta lidhim vrasjen e Ardian Nikulajt me fushatën elektorale?
Fatjon Softa: Mendoj që duhet të jemi të kujdesshëm në analizën e kësaj ngjarje. Fushata është cenuar dhe krijon një lloj pasigurie për këdo në garë për të kandiduar. Rrethanat që ka ndodhur ngjarja lidhen me individin, identitetin dhe aktivitetet që kryente. Ka një sërë pishtash, madje dhe ajo politike, por nuk mund të jetë prioritare, për shkak të identitetit të personit dhe problematikave që mbarte. Aktivitetet e tij që shtriheshin jashtë dhe brenda territorit shqiptar, janë faktorët të cilët duhen të ngrihen pistat e hetimit, pa mohuar pistat e tjera.
Gazetarja: Fushata këtë vit, duket disi e dhunshme, jo vetëm këtë vit, pothuajse të gjithë vitet zgjedhore kanë një rritje të kriminalitetit, nuk e di nëse e vini re dhe ju diçka të tillë.
Fatjon Softa: Rendi publik është cenuar rëndë, madje është në pikat më të dobëta në këtë periudhë, pasi ngjarjet po zënë njëra-tjetrën. Këto kanë krijuar një klimë pasigurie, terrori dhe frike. Aq më tepër që jemi në fushatën zgjedhore, e cila e bën më të dyshimtë atë që quhet qetësia e procesit zgjedhor. Nuk duhet t’i mëshojmë fortë vetëm pistës politike, po pa e përjashtuar atë.
Gazetarja: Dinamika e ngjarjes, nga pamjet e publikuara duket se vrasja kryhet me shumë qetësi në mes të ditës, në lokalin e vetë viktimës. Si është e mundur diçka e tillë?
Fatjon Softa: Është një nga atentatet e rralla, ku autori shfaqet fizikisht, futet në brendi të objektit dhe realizoi vrasjen. Kanë qenë rrethanat që e kanë detyruar të bëhej në ato kushte. Zona në të cilën ndodhet lokali është një pedonale, që futja e një automjeti do ishte më e vështirë, prandaj është zgjedhur motori. E dyta, duket që autori nuk është profesional dhe e treta distanca që qëllon, nuk është më shumë se dy metra, nga 6 fishekë që ka qëlluar dy e kanë kapur viktimën, gjithashtu mënyra si e mban armën, këto tregojnë që autori ka patur sigurinë dhe qetësinë, por jo profesionalizmin. Motori që ka aptur ka qenë një mjet që të jepë mundësinë të largohesh, megjithatë mundësia për ta gjetur nëpërmjet rrethimit është e mundur.
Gazetarja: Nëse i referohemi ngjarjeve të fundit vihet re se nuk ka një zbulim të mirëfilltë të tyre, si është e mundur që puna e policisë nuk çon në rezultate të qenësishme?
Fatjon Softa: Një pjesë e madhe e atyre që janë zbuluar kanë qenë nga kamerat e sigurisë. Pjesa tjetër, rruga operative e kontrollit që përmbledh të gjitha rrethanat, parandalimi i këtyre ngjarjeve, ka persona me precedent që duhet të ruhen. Jo që nuk kemi parandalim, por jemi shumë mbrapa për mbledhjen e municioneve.
