Një shpërthim ka ndodhur orët e para të mëngjesit në kryeqytet në zonën e Freskut. Sipas policisë, një sasi tritoli u vendos në derën e jashtme të një banese në pronësi të babait të babait të Leonard dhe Elis Dukës. Nga shpërthimi nuk raportohet për të plagosur, por ka dëme materiale.
“Më datë 18.04.2023, reth orës 03:00, te Fresku, në afërsi të Insitutit të Fizikës Bërthamore, në katin e katërt të një pallati, në derën e banesës së shtetasit M. D., 65 vjeç, dyshohet se ka shpërthyer një sasi lëndë plasëse“, njoftoi policia.
I zoti i banesës ka deklaruar para uniformave blu se nuk ka dijeni kush mund të jenë autorët. Shtëpia ka qenë bosh gjatë shpërthimit. Muhamed Duka nuk jetonte në atë banesë që prej 4 vitesh.
Shpërthimi ka alarmuar banorët a pallatit. Një banore tregoi për gazetarët se i shoqi përfundoi në spital pas shpërthimit, pasi shfaqi probleme shëndetësore. “Ne kemi qënë në dhomë tjetër, u ngritëm, i ra tensioni, është në spital se iu bllokua veshi nga shpërthimi. Banesa ka marrë dëmtime, pllakat, janë krisur muret. Shpërthimi ishte i madh, i kërkojmë ndihmë shtetit, jemi vetëm dy pensionista. Këtu është shpërthyer dera e pallatit para 4 vitesh“, tha e moshuara.
Leonard Duka u arrestua më 14 shkurt të këtij viti në Belgjikë, ndërkohë që dy vëllezërit ishin shpallur në kërkim për vrasjen e Santiago Malkos në 2019-ën në kryeqytet. Elis Duka është ende në kërkim policor.
Santiago Malko ishte njeri i besuar i Ervis Martinajt, ndërsa dy vëllezërit Duka njihen nga policia si kundërshtarë të Martinajt. Ngjarja e sotme dyshohet se lidhet me veprimtarinë e djemve të të zotit të banesës. Megjithatë, nuk përjashtohet se ngjarja mund të jetë edhe e stisur, nisur kjo nga arrestimi i Leonard Dukës në Belgjikë pak javë më parë dhe si një përpjekje për të mos u ekstraduar.
Kujtojmë se më herët, Martinaj rrëmbeu Mehmet Dukën, pronarit të banesës që iu vendos tritol sot. Ishte kjo nisja e sagës hakmarrëse të vëllezërve Duka ndaj Ervis Matinajt. Ndërkohë, i shumëkërkuari i drejtësisë, Martinaj është denoncuar i zhdukur prej kohësh nga familjarë.
