Më shumë se 100 kilogramë kokainë u kapën në një anije mallrash që ishte ankoruar në Husnes të Norvegjisë.
Gjatë operacionit natën e së enjtes më 13 prill, në Husnes në Kvinnherad, u arrestuan 5 meshkuj dhe 1 femër, të gjashtë janë nga Shqipëria, të moshës 20-40 vjeç. Policia beson se personat përbëjnë një grup të organizuar kriminal.
Së fundmi kanë dalë në dritë të tjera detaje nga mega-operacioni. Anija vine nga Brazili, kurse sasia e drogës ishte lidhur poshtë vijës së ujit.
Sipas disa medieve, shqiptarët kishin një kompani zhytjeje në Shqipëri. Tre prej të arrestuarve kanë mohuar akuzat ndaj tyre.
Operacioni u zhvillua pasi zyrtarët e doganës kishin filluar të kenë dyshime për lëvizjet që po bëheshin në port.
Një zyrtar tha se ky operacion tregon se bandat janë në gjendje të trafikojnë sasi të mëdha kokaine duke përdorur edhe anije të mëdha.
